وصايا ستي
الخيانه وقلة الوفا
وصايا مفعمة بالحكمة الشعبية بقلب ونبض ستي
بقلم الداعي بالخير : صالح صلاح شبانة
Shabanah2007@yahoo.com
ستي رحمة الله عليها اللي عاشت عمرها في القريه ، على زمان ما بقت القريه قريه ..الله يرحم هذاك الزمان ، وعلى زمان ما بقوا ناس القريه ناس ، بجمعهم الحب ، وكلهم عيله وحده ، بس لمّا ستي قبل ما تموت ، وهي تراقب كيف الناسب تغيروا وتمدنوا ، والمدينه بدل ما تبقى خير ونعمه عَ الناس ، صارت دواء ووباء ...!!!
بقت ستي تحزن للي صار وبصير ، فبقى من الضروري إنها توصيني من الزمن اللي مش زمنها ، واللي حست قديش الموت رحمه للإنسان ، إنه يموت بعزه وكرامه قبل ما يدخل زمن مش زمنه ، يتبهدل ويتعتس فيه ،...!!!
الخيانه وضدها الوفا ، راح الوفا وأيام الوفا ، بتظهر الخيانه وبتطل براسها مثل الحيه القرعا .
وليش الحيه بتصير قرعا يا ستي ؟؟ مع انه ما في حيه إلها شعر ، بس إحنا هيذ بنعبر...!!!
لو سألت كون يقللك من السم اللي امخزّن في راسها ...!!!
قديش فلان وفلان أكلوا من خيري وخير سيدك ، وخيرنا من خير الله ..!!!
قديش بقى سيدك يفتحلهم باب داره وقلبه ، ويقدمهم على حالنا اللي ما بقت أحسن من حالهم ، لأنه حالنا بقى واحد ، الا من فسحه زغيره بين فقير وفقير ، لأنه يا ستي (رزق الناس عَ الناس ورزق الكل عَ رب الناس)، وبقى يا ستي بعضهم مجرد ما صلب عوده شويه وطلع له اظفر وناب ، كون يخرمشك ويعقرك ...!!!
الله يرحم اللي قال هذاك المثل (ربيت كلب وعقرني) ...!!!!
بس بقوا يشاوحوا لسيدك يدشر بيدره وينجز لهم بيادرهم ، يدشر حراث قسمته و يشد الفدان و يحرث لهم قِسَمهم ، واقوله: يا ختيار (بعد نفسك عز صاحبك) !!! ، بس ولا بقى يرد علي ولا ايعَبِّر شوري ....!!!!
دار أبو فلان اللي اليوم ما بستنطفوا يحكوا معنا ، الله أعلم كيف بقوا ، وشو بقى موقفنا معهم وأصير ألحن على سيدك وأقول له
عند السخره بحمل مهرة ،وعند شغالي مايل حالي) ...!!!!
حالي ..سد خزوقك وقعورك يا ختيار ونجزّ حاجتنا أول ..وبقى يقول لي :يا مره بلا قلة عقل وين ما رميت المعروف بنفع .أن ما نفع عند العبد ينفع عند رب ، وما بضيع اشي عند رب
العالمين ....!!!
رحمة الله عليه سيدك قديش بقى شهم ،والحمد لله أنه ما عاش زمن الخيانه ، وقلة الوفا...!!!
هلقيت الله لا يحيجك في البادي ،لو إنك احتجت شغلة ورحت على فلان هذاك ...!!!!
..كون يلا قيك في بياض رجليه ..يعني في قاع رجليه .....!!!!
بقوا الناس يا ستي إذا ما بده ايوريك وجهه يدير لك ظهره ،بس اليوم بوريك قاع صرمايته ..مش مهملك وبس ..لأ ،أخرى بحتقرك ،كأنك طول نهارك تلحس من دار أبوه صحون ...!!!!
الخيانه ، الله يقطعها ويقطع أهلها وأصحابها ،والله يرحم هذاك المثل اللي قال
من خان لا كان ،ولا بقى له مكان )....وصدق المثل اللي قال
رَبّي الغراب بخزق لك عينيك ،وربي الضبع ببعطلك كرشك) ، وهيذ صارت أحوال الناس لمّا شلحوا جلودهم ولبسوا جلود غيرها...!!
يا عيب يا ستي وألف عيب على اللي ما بعرفوا العيب .يا عيب على اللي يوخذ الناس لحم
وبرميهم عظم ،ويا حسره وحزن على اللي (وقت خيره لغيره ،ووقت همه بجيبه لأمه) ...!!!!
والخيانه وقلة الوفا يا ستي وجوهها كثيره ..وأنا شو بدي أقولك لما أقول ؟
قال المثل
عاشوا ما دللونا ،وماتوا ما ورثونا) ،وقال المثل
ركبناه ورانا حط إيده ،في الخرج) ،وقال المثل يا ستي (فتحنا له الباب فات وفوت حماره) ..وقال المثل
الدار دار
أبونا ،واجوا الغرب يطحونا )....!!!!
يا شؤم المصابح ومقابح ..هيذ الدنيا ..وأنت عايش فيها بأمر ربنا ..هاي اللي عندي قلته ..وعقلك في راسك تعرف خلاصك وسلامة فهمك يا ستي ...!!!!
تقرأ بلهجة أهل سنجل
