دلعونا- 6
نماذج تراثية وطنية من الغناء الشعبي الفلسطيني
نظم وتأليف : الداعي بالخير صالح صلاح شبانة
Shabanah2007@yahoo.com
على دلعونا ونزلت عَ الخله ، حجرها حميضه وزعتر اتملا
غدوتنا اقراص يبارك الله ، نوكل بلاوي تنعبي لبطونا
بَيّن شعرها يا الله عَ طوله ، مرخي عَ ظهرها جدايل محلوله
لمّا يتجدّل مع القرموله ، سعاده وهنا للي يشوفونا
وين ما دارت بتفوح الريحه ، حطت في لِقلوب بسمه وتفريحه
ورد وياسمين وزهور مليحه ، بالقوار مزروعه عَ البلكونا
يا رب اسعدها واسعد هواها ، حبيبة قلبي وانا بهواها
هي سعد حياتي وهناها ، ام لعيون اللي يتنعوسونا
شعرك ليل وسواده حالك ، وانتِ المعشوقه وانا اللي عاشق
عاشق وماني قادر أفارق ، ذوّبت قلبي بغمز لِعيونا
شفتك يا حلوه شفتك عَ التله ، بسمات شفافك اتداوي العله
شربها قلبي مثل ما النحله ، تشرب رحيق الورد والحنّونا
حلفتك بالله هيه يا حياتي ، تسقيني رشفه من البسماتِ
لمَنّ أشوفك بصير أهاتي ، وعقلاتي اتطقطق مثل المجنونا
يَمّ الزنار غالي وبلمع ، المولى بحكم والعبد بسمع
يا للي غايب يا ريتك ترجع ، وبطلاتك انكحِّل لعيونا
على دلعونا ويَمّ الردنيه ، حبك خلاني أغرق في الميه
ما عندك رأفه ولا حنيّه ، تطفي لهيبي بنظرة لعيونا
على دلعونا والسمرا جمره ، حرقتها حرقه منها ما ببرا
كل ما طافت وبخيالي تِطرا ، يرف القلب مثل المجنونا
حبك كتبته بالسطر الأول ، يا للي نظراتك صابتني بمقتل
وزمان الأول مضى واتحوّل ، وراحت أيام القلب الحنونا
حبك سيدي وعنقرة راسي ، حبك مالك عليّ احساسي
يضرب جوّاي دنادن واجراسِ ، هباته كل ما ننسى بتذكرونا
يا سنين الغربه بكفي مراره عصّرت القلب ونحضتِ أسراره
لا ظلت أمينه ولا ظلت ساره ، ذابوا في القلب وذوّبونا
مرت تعرم مثل الحمامه ، يا قلبي نزعت منه ألآمه
وبأصبعها طبعت علامه ، حبك للأبد اللي مضمونا
تقرأ بلهجة أهل سنجل