374- حافظ عَ الباروده
بيع مداسك وامشي حافي ، بيع ثيابك وامشي عاري ، بيع رغيفك ونام عَ الطوى والجوع ، بس إوعك تبيع الباروده
إن بعت الباروده بعت عمرك ، اللي ما عاد يساوي إشي ، وصارت أيامك ذل وعِرّه ، ولياليك مشحبره وسوده
وصار الذل أمك وأبوك ، وأختك وأخوك ، وصرت مشروع موت ، كل ما بدّه إيّوَرِِّدْ هواته فيك تيثبت اوجوُدَهْ
الحفا والعري مش عيب ، إذا الفقر حَكَم ، قدّيش الفقر بغرز انيابه فينا ، وقدّيش عينه علينا مرصوده
بس بنحاربه ، حتى لو أكلنا تراب ، تراب الوطن غِذا ودوا ، وللجرح ميّه وملح ، واحنا للوطن حُرّاسه وجنوده
إحنا فِدا للوطن ، فدى للأرض اللي بتعطي أكثر من الأخذ ، لولا عطاها ما عشنا عَ الأرض نحمي تراب الوطن وحدوده
إنتَ وأهلك ، جذرك ونسلك ، فدى للأرض ، والباروده إلها يوم تدافع عنك ، لا تنسى إلها لحظه موعوده