382- حب الوطن جبل
حب الوطن جبل يا جبل ما هزتك ريح ، وحب الوطن برد الحياه في الذبيح ، وبفتح قدّامه بدل الفرجه ألف فرجة أمل
حب الوطن عمل ، أرض بنزرعها شجر ، وكل ما قطفنا منها ثمر ، ولاّ حصدنا راجودة قمح ولاّ شعير يحملها حمار ولاَّ جمل
فتحت البيادر صدرها ، لغمور القمح بجلالة قدرها ، وصار رغيف الخبز حِصِنّا ، إللي برفع راسنا للقمر ، ولزحل
ورجل المستعمر ما بتوطى عَ صِدِرنا ، ولا بحاربنا بحشوة بطِنّا ، إحنا زرعنا واحنا حصدنا ورجدنا ، ورغيفنا ثمرة العمل
الأغاني للوطن مش بالصوت ، الأغاني نحمي أرضه الحُرّه ولآجله نموت ، ونرسم بالفاس و سكة لِحراث عَ السفوح والتلل
عَ الموارس والحرايق ، عَ الرسوم والسهول ، عَ روس الجبال وجوه التلوم ، نزرع حاجتنا من كل إشي إلنا وللحلال بنّأَكَل
ولمّا تبقى خوابينا بالخير معبيه ، وجرارنا مليانه زيت ومطينه ، والبصل والعدس للقمح رديف ، ننام في أحلام العسل
