دلعونا- 11
نماذج تراثية وطنية من الغناء الشعبي الفلسطيني
نظم وتأليف : الداعي بالخير صالح صلاح شبانة
Shabanah2007@yahoo.com
ثوبك لِمقصَّب حريره هندي ، شرّبته بعرق جبيني وزندي
خايف تنصابي بالعين وتنحسدي ، الله يحميها من اللي يحسدونا
زمَّر بنيك يا سيدي زمَّر ، حظك مزبط وحظي معثَّر
وهذا الإشي من الله مقدّر ، الله يسامح ها للي ظلمونا
على دلعونا ومحلا طلتها ، اطنعشر طُبّه على قبتها
قلبي انتلا بعشقها ومحبتها ، ام الجدايل والحاجب نونا
على دلعونا يا ام الشفايف ، رديلي روعي ولا تخليني خايف
خيالك جوّه فكري طايف ، ينسخ أفكاري على الكربونا
قلبي بحب السمرا والله تحَيّر ، عصفور زغيِّر يا دوبه طيّر
وانا عن غيره أبد ما اتخيَّر ، وغيرك ما بقبل لو خيّرونا
دم حبك بنبع من قلبي ، وانتِ الوحيده اللي بتنحبّي
ولمّا ببسماتك عليّ بتهبي ، بصحى ولو كنت بسابع نوما
على دلعونا يَمّ التركيه ، غرقان وغارق بحب الصبيه
حب الصبايا اتمدد فيّ ، مثل الشرش في الأرض الحنونا
بسماتك عَ الشفّه ترسم آهاتي ، خريطه اتخطط خطط حياتي
مطبوعه صوره جوّه ذكرياتي ، ما بنسى الحبايب حتى لو نسيونا
حبك جارحني ومسيل دمّي ، ريتك يا حلوه تصيري بنت عمي
وتصيري نصيبي و حماتك أمي ، ونخلف دزينه بنات وبنونا
على دلعونا وحِنّوا علينا ، احنا زرعنا فل وياسمينا
احنا زرعنا القلب الحزينا ، تيّنَوِّر أمل ورد الحَنّونا
حني علينا يرحم الوالد ، يَمّ الشفايف حلاها زايد
يَمّ الشفايف جمرها قايد ، البسمه عليها تسوى مليونا
انتِ النشميه وبيك الفارس ، وانا المخاطر عن روحي إمآيس
لو تنحرسي حتى بألف حارس ، رح أوصلك هيه يا مزيونه
يا للي مزروعه جوّه لِصخورِ ، خايف عليكِ اتظلي وتبوري
نعشق غزلان وما نعشق نمورِ ، نعشق صبايا مثل الحَنّونا
عقدت الكشره وقالت لي وينك ، ليش تعاديني شو بيني وبينك ؟
إن عرفوا أهلي طالولك عينك ، وخلوك أعمى من غير عيونا
تقرأ بلهجة أهل سنجل
