دلعونا- 12
نماذج تراثية وطنية من الغناء الشعبي الفلسطيني
نظم وتأليف : الداعي بالخير صالح صلاح شبانة
Shabanah2007@yahoo.com
دانت أيامي يا حلوه دانت ، وبحب السمرا أيامي ازدانت
فاتت جوّه القلب يا عيني فاتت ، تعمل عمايل فيَّ وفنونا
خدك يا خدك يا قرص الزعتر ، مثل جماله الله ما صوّر
اللي انحرم منه يقعد يتحسر ، واللي ناله يغني ويدبك دلعونا
على دلعونا ومالك علينا ، صبّحنا عليكم ردّوا علينا
يا للي مفحفحين بعطر الياسمينا ، لو شمّه منه تشممونا
ثوب الحَبَر ومنديل الجورجيتِ ، حرَقِن قلبي وخرّبن بيتي
يّمّ لعيونِ مثلهن ما رأيتِ ، خلّن القلب عاشق مفتونا
تحت الشفايف صفينِ لولو ، يا للي شفتوا تعالوا قالوا
واللي سمع وقع من طولوا ، الله يعين اللي شافوا بالعيونا
دَوِّر يا مدّوِر ودَوِّرْ عليها ، حقيقه وضاعت وين انلاقيها
البنت البيضا الله يجازيها ، والبنت السمرا أحسن ما يكونا
حِنّي عليّ وارحمي حالي ، الجسم مضحضح والعظم بالي
والعقل اللي بقى راس مالي ، طيّرنه بلحظه يا عيب الشوما
حلوه وجمالك كا لشمس باهر ، محروسه من الله القادر
بإذن الله اندّق المزاهر ، وتصيري عروسه أحسن ما يكونا
هيه يا اللي رشيتِ عَ حالك ريحه ، وخليتِ قلوب الشباب جريحه
يا ربي ذوّبني بهوى لِمليحه ، اللي خلّت قلبي عاشق مفتونا
يا للي زرعتِ ورد وريحانِ ، فيضي عليَّ بنتفة حنانِ
القلب ملوّع وبحبك هيمان ، جودي علينا كوني حنونا
لمّا تقابلنا ولمّا تلاقينا ،خلينا الحكي تقوله عنينا
عطرك يا حلوه فحفح علينا ، يا للي خليتِ القلب مفتونا
تقرأ بلهجة أهل سنجل