دلعونا- 20
نماذج تراثية وطنية من الغناء الشعبي الفلسطيني
نظم وتأليف : الداعي بالخير صالح صلاح شبانة
Shabanah2007@yahoo.com
ياللي وقفتِ الميه بزوري ، حبك جنني وطيّرني بسروري
يا سعد قلبي مطرح ما تدوري ، تصيبي قلبي بسهم لعيونا
ليلة الفرح ليله مشهوده ، بالله يا حلوه تخليها بعوده
ساعات الفرح دايما معدوده ، فيها بنحَلِّق بلا جنحانا
أصابع إيديك خيار مقشّر ، يا ربي ليالي الفرح تكثر
واتناول منها الخبز لِمقمّر ، الطالع سخن من جوّه الطابونا
حِنّي عليّ وبنظره جودي ، قبل ما يطلعلك سعد السعودِ
وتدور الميّه جوّات العودِ ، ويفحفح علينا عطر الياسمينا
بسماتك تقطر مثل الندى بدري ، يا للي ملكّتِك قلبي وعمري
سلمتك قلبي ووجداني وفكري ، أمانه أبيَدِّك بلكي تصونونا
سمرا وسمارك قهوه وبتفوحِ ، تنعشي القلب وتداوي جروحي
مزروعه جوّه قلبي وروحي ، ريتك تظلي حلوه وحنونا
دماتك أحلى من السكر واللوزِ ، يا للي لاعبتيني بالفرد والجوز
أنا وقلبي تحت الأمر لمّا بتعوزي ، سمعا وطاعه الأمر بكونا
حني عليَّ وجودي يا سمرا ، أيامك حلوه وفيها مسَرّه
ليش بتهجريني وبترميني بحسره ، وقلبك أبيض وحِسِّك حنونا
لمّا تلاقينا نسينا الماضي ، وفتحنا دفتر لسّاته فاضي
نبداها من الأول حب وتراضي ، وما تشمِّت فينا اللي يحسدوننا
حبك أسقاني شراب معطر ، مطيب بالورد امحلى بالسكر
على دلالك اللهُ أكبر ، انخلي العالم يصير مجنونا
ريتك من حظي وتصيري حلالي ، خفة حمامهِ وكحلة غزالي
ولمّا اتطلي مثل البدر اتلالي ، خليتي العاقل يصير مجنونا
تقرأ بلهجة أهل سنجل