دلعونا- 21
نماذج تراثية وطنية من الغناء الشعبي الفلسطيني
نظم وتأليف : الداعي بالخير صالح صلاح شبانة
Shabanah2007@yahoo.com
عَ شفافك بسمه تسحر العابد ، وتطلع العاقل عن العوايد
تنشر النشوه في عروق البايد ، ويصبر يزقزق مثل الحسونا
بيضا وبياضك زي البلورِ ، مرجوعك اللي وين ما بتدّوري
صبيه حلوه مثل البنات الحور ، شوفتها فرح عَ الله العونا
سرقتني عيونك من عز النومِ ، عاشق عيونك دايم دومِ
يا رب نتلاقى في النبق والدّومِ ، ونقعد سوا تحت الليمونا
محلا الدوالي محلا الدوالي ، نتلاقى فيها أنا والغالي
نتلاقى سوا عَ التل العالي ، نرقب فوقه اللي يمرّونا
شفتك يا سمرا يَمّ الردنيه ، وصف البُكَل تضرب تحيه
اطنعشر بكله والغُرّه مرخيه ، والشعر ملوّى زي الحلزونا
لمّن حبيتك أعلنت الطاعه ، أمرك يا ستي رضا وقناعه
حبيتك بكل اخلاص وشجاعه ، يا رب تظلي حلوه ومزيونا
حبك رماني بالسهم القاتل ، حب الصبايا صعب المسائل
الحل معقد والطالب فاشل ، وانتِ الأستاذه بغمز لِعيونا
حبك ضيّع لي برج من راسي ، حرق لي قلبي والهب احساسي
لمّن شفت قدِّك المياسِ ، تهت بحبك زي المجنونا
ريتك من حظي والله يهنينا ، وشو ما طلبنا منه يعطينا
يمنحنا الرضى ويحقق أمانينا ، ويسعدنا أحلى سعاده في الكونا
نظرات عيونك ترمي الشجعانِ ، مليانه فتنه وتقطر حنانِ
ولمّن أشوفك بجن جناني ، حبك أسرني هيه يا مزيونا
ردي شاليشك وارحمي حالي ، حبك لخبطني وغيّر أحوالي
وانتِ رصيدي وثروة أموالي ، وبغلالك الغالي وما يرخصونا
تقرأ بلهجة أهل سنجل
