وصايا ستي
قضايا السوق
وصايا مفعمة بالحكمة الشعبية بقلب ونبض ستي
بقلم الداعي بالخير : صالح صلاح شبانة
Shabanah2007@yahoo.com
قالت لي ستي الله يرحمها : شوف يا ستي ، ترى قضايا السوق قضايا مهمه في الحياه ، بجوز ما تصير تاجر ، وتطلع فلاح مثل سيدك ، مع اني متأكده انه جيلك جيل خايب ، بس لسبُد وانت تحتاج السوق كل يوم ، لأنها حاجات حياتك مربوطه بالسوق ، ومش مثل حياتنا أيام زمان ، بقت حياتنا مربوطه في خزين مونة الدار ....!!!!
فأول نصيحه بقولك إياها هي نفس النصيحه اللي نصحوها لجحا يوم قالوا : ((كون في أول السوق يا جحا ، ولو لقص اللحى)...!!!
إنك تبكر عَ السوق مشان توخذ من راس الكوم ...!!
وبعدين يا ستي : (اشتري المجلوب ، ولا تشتري المطلوب) ، ها للي بتلاقيه متوفر في السوق ، وبضاعته مرمَيّه ، اشتري منه ، اليوم بتلاقيه ، بكره ما بتلاقيه ، هذي لِبضاعه يا ستي عرض وطلب ، والمجلوب الكثير أرخص من المطلوب القليل ، وهذا مهم الك كيف تقتصد بالقرشين اللي معك ، وما تتفشخر سلامة قدرك بالكذب وتصير مثل بعض الناس من اصحابك الكذابين..!!!
والبضاعه في السوق يا ستي ، يعني مثل ما قال هذاك المثل : (سبحان مزين لِبضاعه في وجه المشتري) ، بزينها في وجوه الناس ، وكل واحد بوخذ حاجته ، وزي ما قال المثل : (كل فوله مسوسه والها كيال أعور) ، ولا تشتري شغله مش محتاج الها ، لأنه يا ستي : (اللي بشتري اللي مش بحاجه الو ، ببيع اللي في حاجته) ، فليش عاد تروح تشتري شغله انت مش محتاجها ، تَتّبَيّعَك الشغله اللي انت محتاجها..؟؟؟
هذا إذا عضتك الحاجه ...!!
وانت عارف يا ستي ، إنه البايع مش مثل المشتري ، ولمّا تيجي تبيع بصيروا يبّخسوا بضاعتك ، وخصوصا إذا اللي بده يشتري تاجر ...!!!
فإذا شفت التاجر صار يعيب في شغلتك ، معناه انه بده يبخسها حقها ، مشان يوخذها بتراب المصاري ، وما بعرف انه بَخْس الناس أشيائهم ظلم ، وعلى لسان سيدنا الرسول عليه الصلاة والسلام ، (لا تبخسوا الناس أشيائهم ) لأن البخس يجانب العدل وضد العدل الظلم ، وربنا سبحانه في مكانه حَرّم الظلم على نفسه قبل ما حرّمه علينا ...!!
وعلى رأي المثل (يا شاري احسب نفسك بايع ، ويا بايع احسب نفسك شاري)...!!!
والتجاره ربنا سبحانه وتعالى بارك فيها ، وبقول المثل (اشتري بخمسه وبيع بخمسه ، رزقتك بين الخمستين)...!!!
واذا اشتريت بضاعه احسب حساب انك ممكن تحتاج يوم وتبيع ، فبدل ما تدّور على نقوش ورسوم وخراريف فاضيه ، شوف الجوهر تبعها ، بتحافظ على سعرها ولاّ لأ..؟؟؟
والتجاره يا ستي عِلِم ، والتاجر عُرضه انه يربح ويخسر ، و(التجاره حظ وشطاره ، مثل ما هي ربح وخساره) ، ومرّات الحظ لحاله ممكن يوديك في داهيه ، ويخسرك اللي فوقك واللي تحتك إذا تخلى مرّه عنك ...!!!
والشطاره لحالها صعبه وقاسيه ، ودربها طويل ، بس بتوفرلك حياه عاديه ما تحتاج لحدا..!!
وأسوأ التجار اللي عنده حظ وقلة دين ، لأنه بساوي السبعه وذمتها ...!!
وأحسن التجار وأشرفهم اللي عنده حظ وشطاره ودين، فهو بشتغل بحق الله سبحانه وتعالى ، وبظل ضميره طاهر ونقي ، ورزقه وافر موفور ، قول ان شاء الله...!!!
والمثل يا ستي بقول : (بيع الفحم وكُل اللحم ) ، ومهما بقت تجارتك رح تبقى تنقط في حلقك ، وحلوق عيالك ، واختار لِبضاعه لِمليحه ، لأنه نفاقها أسهل وأحسن ، واذا بضاعتك روحها قصير ( بيع واندم ، ولا تخلي وتندم)...!!!
ودايما مثل ما قلت لك ، خليك مثل عمك جحا في السوق لأنه (بيع الصبح ربح ، وبيع المسا نصر) مهما بعت وبقدّيش ، انت الربحان ، وجدد ثاني يوم بضاعه طازه ...!!!
اشتري يا ستي وبيع ، وجهدك ان شا الله ما يضيع ...!!!
ربنا من عالي السما يوفقك ، ويفتحها بوجهك ...!!!
وسلامة فهمك يا ستي ...!!!
تقرأ بلهجة أهل سنجل