دلعونا- 27
نماذج تراثية من الغناء الشعبي الفلسطيني
نظم وتأليف : الداعي بالخير صالح صلاح شبانة
لمّا تلاقينا هذيك الخطره ، سألتك اسمك قلتيلي خضره
بَحَشْتِ جوّه القلب حفره ، ودفنتِ فيها آهاتي المحزونا
حبك رماني جوّه المخاطر ، وزرعني جوّه أحلامك ناطر
حَسَّبِّت حالي متكتك وشاطر ، طلعت صفر قدّام لِعيونا
حبك مشّاني حاسر وحافي ، فيوزي ضارب وقنديلي ضاوي
وانتِ لا بتحنّي ولا بتخافي ، تصيري مثلك عقلي مجنونا
يَمّ الشفايف تهمس وتحاكي ، خلعتِ قلبي بجوز التراكي
افرشي المضافه وحطي المراكي ، جاينك نخطب يا نور لعيونا
سمرا وسمارك كله حنيّه ، حياتي بحبك صارت هنيه
بدنا نعلنها ميّه بالميه ، بخطبه وعرس عَ كل الكونا
ساعة ما شفتك من ورا الطاقه ، دقات القلب صارت خفّاقه
يا الله نتفاهم على الرواقه ، ونتلاقى سوا بفي الزيتونا
ساعة ما شفتك مثل الأميره ، بيعتيني حالي وصرت عَ الحصيره
يا للي قطعتِ من داري الخميره ، يدهاك بطرش وعمى لِعيونا
قريت بعنيك نظره غريبه ، نظره مليانه شك وريبه
ريتك من قلبي تظلي قريبه ، ونفرح مع بعض يا نور عيونا
سمرا ويا سمرا وشفتك بالساحه ، جوّات عيونك نظره ذبّاحه
نظره مليانه عشق وصراحه ، اتخلي الفارس صريع لِعيونا
ركبنا الفرس وطِحّنا نسابق ، وعبير الورد في الهوا عابق
الفرس لقيت لِحصان العاشق ، وخسرنا السبق وعلمه ولِفنونا
سنين الغربه يا الله ما أقساها ، لمّن في القلب ترمي مرساها
ذقنا من لوعتها ومن أساها ، حنظل وعلقم ملاّ لِقلوبا
تقرأ يلهجة أهل سنجل
