دلعونا- 31
نماذج تراثية من الغناء الشعبي الفلسطيني
نظم وتأليف : الداعي بالخير صالح صلاح شبانة
سمرا وجميله وجمالك غِيّه ، ومثل جمالك ما شافت عيني
حبك جنني ميه بالميه ، ووداني دغري عَ المورستانا
أنا عقلي شت مني وطارِ ، والقلب لهلب وشعلل بالنارِ
لمن أشوفك بباب الدارِ ، إتخُطي بالمرود كحل للعيونا
يا رب اسعدها البنت الشلبيه ، فيها الحلا والجبنه الطريه
نظرات عيونك يا ضرب الشبريه ، تستل القلب بنظره حنونا
إنتِ لِعبَيّه وانا الفارس ، واللي بحبك عَ الروح إيآيس
حطيني عَ باب دارك حارس ، أضرب تحيه لأم لِعيونا
يا رب يا محمل لِغيوم مطر ، ومزين السما بطلعة القمر
احفظ حبيبي من أي خطر ، ومن عيون اللي يحسدونا
وردن أربعه عَ البير الغربي ، ثلاثه نجوم والرابع حبي
جمالك يا سمرا سلب لي لبي ، وخلاني تايه مثل المجنونا
لمن حبيتك سلمتك حالي ، جدولك هفهف ورن الخلخالِ
ولمّن بشوفك تنبت آمالي ، وتعبق عطر مثل الليمونا
على دلعونا محلا طلتها ، ذهب ولولو ورا شفتها
تبارك المولى على بسمتها ، نشرت الشمس على الكونا
حبي الأسمر مغتر بحاله ، يتباهى علينا بحسنه وجماله
يجرحنا ويمشي ولا عَ باله ، طبعه غريب وما هو حنونا
حبك أطلعني عن طوري وطبعي ، وقر في قلبي وشوفي وسمعي
وقلبي القاسي حممته بدمعي ، تصار حبيّب عَ اللي يحبونا
يَمّ الشفايف يَمّ الشفايف ، أحلى من النمّوره ومن القطايف
مضيت العمر مرعوب وخايف ، حدا يوخذها مني المزيونا
تقرأ بلهجة أهل سنجل
