دلعونا- 35
نماذج تراثية وطنية من الغناء الشعبي الفلسطيني
نظم وتأليف : الداعي بالخير صالح صلاح شبانة
على دلعونا ويا أرض بلادي ، ميّاتك عذبه تحيي الفؤادِ
وصوت الحرّيه من التِلِم ينادي ، ابذروا البذر ويله ازرعونا
أرض الحريه تنبع شهاده ، قدّمها الشعب من دم اولاده
الله يحميها الأم الوَلاّدَه ، مَ تخاف الردى ولا المنونا
نسيم الوطن من صدري يلمع ، بريح الأرض المزروعه مشَبَّع
يا ربي واجي يا ربي اتطَلّع ، يا ربي انصرنا عَ اللي يعادونا
حملت حَجَرِّها ونزلت تقاتل ، اتحدت الجندي ضرّيب القنابل
رجمته وقالت له تِخسا يا سافل ، احنا نشامى وما بتخوفونا
دقينا السكه في الأرض الصلبه ، تِزرع حياة سلام ومحبه
نرفع هاماتنا وفي الرمل ما نتخبّا ، ندوس الغاصب ابن الملعونا
نزل لِمناضل عَ الجبهه يقاتل ، حامل رشاش وشرشور وقنابل
اتحدى الأسير وقَطّع السلاسل ، ويلك يا غاصب من هذاك اليوما
همست الحنّونه لعِرق الزعتر ، يا جار الرضا مالك مكَدَّر
شكى من العطش وقلة المطر ، وتوسَل الخالق يا ربي اسقونا
مرقت الديمه تمشي وتتهادى ، مليانه ميّه عَ السِبِر والعاده
حطت حِمِلها وشويه زياده ، يا ربي تبارك صاروا ينادونا
الوطن أخضر محلا ربيعه ، بمال الدنيا أبد ما بنبيعه
يا للي بزاود ايسكر نيعه ، يسكتر برّه ويبعد من هونا
ترابك ذهب منه ارتزقنا ، وحجرك لهب منه تسَلّحنا
واللي يحاول يقرَب ساحتنا ، يجيه الأجل عَ العَجَل والمنونا
شد الحرّاث عَ الفدان وغنّى ، تسلم سليم معافى يا وطنّا
وفي عيون اولادك تسكن وتتهنّى ، وتفييّ علينا مثل الزيتونا
سرحت الغنم والراعي عاشق ، ترعى عشبها والنغم دافق
يا محلى أرضي وما بقدر أفارق ، ترابك خلاّني قيس المجنونا
الأرض الحره بتهتز وبتتزلزل ، تحت رجلين الغاصب المُحْتَل
وبلهب الثوره الحُرّه بتشتعل ، وحجرها جمر بالشرر مسكونا
مقدّس ومبارك زيت الزيتونِ ، قدّيش أكلنا وعبينا لِبطونِ
قدّيش قطفنا وعصرنا طنونِ ، منك يا طاهر وغصنك حنونا
تقرأ بلهجة أهل سنجل
