دلعونا- 42
نماذج تراثية وجدانية من الغناء الشعبي الفلسطيني
نظم وتأليف : الداعي بالخير صالح صلاح شبانة
شفتك بالحاره هيه يا سماره ، شنّيت الحرب عليك والغاره
وما اخذت قدّامك شربة سيكاره ، بعديها صرت تايه مجنونا
على دلعونا محلا طلتها ، يا حب اللولو منَدّي عَ جبهتها
حبّات العرق اللي بتبللها ، تجرح وتداوي بلبخة طيونا
حبك هلّي بستعبد وبقهر ، خلا دمامل قلبي تتفجر
صرخت وقالت اللهُ أكبر ، يا ربي ارحمني من اللي يذبحونا
على دلعونا وشاليشك طاير ، سقا الله عَ القرمول والضفاير
وانا هواوي والعقل طاير ، وانتوا اللي بتقسو وما بترحمونا
منديلك مرشوش بقزازة ريحه ، يا للي خليتِ لِقلوب جريحه
دخيلك أنا يا لبنت لِمليحه ، تحنّي عليّ وتكوني حنونا
الطير الطاير من فوق الساحه ، شافك بالدبكه وانتِ اللواحه
بدنا نحكيها بكل الصراحه ، ذبحنا الرمش والحاجب نونا
على دلعونا يا بنت عمي ، شمي عَ حالك وفي البيت التمي
جرّحتِ القلب ونشّفتِ دمي ، بسواد لعيون وبياض لِسنونا
لجل التقطبه والصَفَه والقذله ، عن حبك لا يمكن أبداً أتخلى
ومهما طلب أبوك فيك واتغلاّ ، رح أدفع بدل الميه مليونا
تسريحة شعرك مفروقه جنابي ، وصف البُكل خزّوَق لي جيابي
يا للي سرقتِ لِعقول والألبابِ ، لولا شويه خرّبتِ الكونا
انتِ لِمليحه وانا لِمشبب ، بارم شنباتي ذنبة العقرب
ولو واحد غيري منك قرَّب ، لرميه بالحسره وعيب الشوما
شفتك بالحقله بتقلعي بطاطا ، لهلب القلب والعقل شاطه
ولوغيري قربلك لخَرّطه خراطه ، واعصر عَ خرطاته حبة ليمونا
تقرأ بلهجة أهل سنجل