دلعونا- 44
نماذج تراثية وجدانية من الغناء الشعبي الفلسطيني
نظم وتأليف : الداعي بالخير صالح صلاح شبانة
على دلعونا يا شمس غيبي ، ميعادي المسا مع حبيبي
أنا طنيبه المولى المجيبِ ، تجمعنا سوا عَ وسادة نوما
اتنهد لمّا لامس جفنك المرود ، تحت خطواته عَلّم الخطِ لِسوَد
قديش الكحله عَ جفن البيضا اتوَرّد ، عَ البلد شباب مجنونا
على دلعونا ومحلا بسمتها ، ذهب ولولو تحت شِفِتها
محلاها يا عالم محلا طلّتها ، طلة القمر بين لِنجوما
من تحت المنديل طلّت جدايل ، الله وكيلك عملت عمايل
القلب انخلع والعقل مايل ، وصار العاقل ثلثين جنونا
طلعت تتقمز طلعت تتمايل ، غزاله يا عالم وارخت جدايل
هيذ الله خلق الأصايل ، خلقهن عَ الدنيا تينعمونا
بسحر الحاجب والرمش تجرح ، ولمّا تشرفنا بتزين المطرح
وبعد الحزن القلب يفرح ، يرقص ويغني على دلعونا
ثوبك لِمطرّز حيّر لي عقلي ، خلاكِ تزداني بعيني وتِحْلي
يا رب يزيدك حلا وتحلي ، العقل محير تايه مجنونا
يا طير الطاير بلغها مني ، للحلوه البهيه كل التمني
بلغها بعد السلام اني ، عاشق هواها البنت المزيونا
حيرتِ قلبي وحيَرتِ دليلي ، يَمّ الفستان لِزرَق النيلي
كَنّي محقوق هذا شليلي ، تأمر وتمون يا اسمر اللونا
السر الخالد في القلب خبيته ، حتى للحبيب الغالي ما اعطيته
سر المحبه في النفس تاويته ، تَ اعِز النفس وما اظهر مغروما
يا قلبي مالك مش قادر عليها ، هلي سحر الدنيا جوّه عنيها
تسلم الكحله والحنه عَ ايديها ، تسلم لقلبي السمرا المزيونا
تقرأ بلهجة أهل سنجل