دلعونا- 48
نماذج تراثية وجدانية من الغناء الشعبي الفلسطيني
نظم وتأليف : الداعي بالخير صالح صلاح شبانة
يا للي زغردتي يا للي هاهيتي ، يا لوكس مضوي ينور لي بيتي
ولمن همستِ ولمّن حكيتي ، رَقّصّتِ القلب وغنى دلعونا
انتِ من الجبل ولاَّ من الوادي ؟ يا لهَفتِ قلبي وفؤادي !!
المولى بسمع والعبد بنادي ، يا رب اقسم لي الحلوه المزيونا
ثوبك لِمطرَز واقف لحالو ، من كثر الحرير اللي عَ ذيالو
ولو قالوا العوازل عنه مهما قالوا ، بتظلي قمر طالع عَ الكونا
على دلعونا ومالك عليّ ، يا للي نظراتك حُب وحنيّه
وانا لِمدَله بحب الصبيه ، نظراتك بلسم فيها اتداوونا
يَمّ الجدايل ومجدلتيها ، جننتِ الحاره واللي حواليها
نظراتك فخ وصِدْتيني فيها ، وخلّيتِ العقل تايه مجنونا
نزلت عَ المقاثي تلقط كوسا ، يا الله شو كِشّرَه وعبوسه
ريتك بعين الباري محروسه ، يَمّ الجدايل يتلوحونا
يَمّ العَصْبَه يّمّ الردنيه ، مشياتك في الحاره تيه وغِيّه
ونظراتك صليات البندقيه ، تصاوب عَ الصدر وتطخونا
أنا من الجبل وانتِ من الساحل ، هَدّيتِ قلبي هَد السناسل
طلبتك قالوا عروسه وناقل ، يتربى الصبي بعز المزيونا
قلت لها الاسم قالت لي سَمِيَه ، يحميها الخالق رب البَريه
مشية غزاله وردِت عَ الميه ، لمّا تتمشى وتمرق من هونا
يا للي مَرَقتِ وما حدا شافك ، كنستِ الحاره بطرف عباتك
لو قدّر وصارت أمي حماتك ، لذبح الحايل وابو لِقرونا
على دلعونا ومرقت من عندي ، الثوب مطرز ولونه نهدي
حريره ياباني قماشه هندي ، يسلم الثوب واللي يلبسونا
تقرأ بلهجة أهل سنجل
