دلعونا- 49
نماذج تراثية وجدانية من الغناء الشعبي الفلسطيني
نظم وتأليف : الداعي بالخير صالح صلاح شبانة
على دلعونا ومَرّت من حَدّي ، مثل العصفوره ترفرف وتهدّي
ولو قد لِبنيه بقى عَ قدي ، لَحّمِلها بقلبي وارحل من هونا
انتِ من السهل ولاّ من الوادي ، يا للي شعلتِ قلبي وفؤادي
لَمْشي في الخلا واظل أنادي ، بلكي الحبايب حنّوا وسمعونا
عَ شان عيونك جبنا جاهه ، مخاتير البلد واهل الوجاهه
توكلنا عَ الخالق وشفاعة طه ، تتصير الحلوه النا مضمونه
على دلعونا وجروحي داويها ، يا مهيره ما قِدِر حدا يباريها
لو تطلب عمري غير اعطيها ، وعمري يرخض للحلوه المزيونا
على دلعونا ونزلت تحَطِب ، عروسه جديده وحِنّاها مرَطِب
هواها قاسي للقلب يعَذِّب ، حطت في العقل حطب وجنونا
على دلعونا يَمِّ لِعصابه ، يا للي صَوَّبتِ القلب صوابا
ملّيتِ النفس حزن وعذابا ، كل ما مرقتوا ولا تحاكونا
عجعج هواها عَ الصبح بدريه ، يا ربي تسعد ها لبنت النشميه
هواها في القلب من حلاته غِيّه ، يا ربي تجمعنا سوا بفيّ الزيتونا
اسمك اسّميره ولاَّ سماره ، ولاّ عصفوره تدرج بالحاره
كلك حلاوه وخِفه وشطاره ، يا للي خليتِ العقل ثلثين جنونا
على دلعونا وهيه يَمِّ الشامه ، خطفتِ قلبي بلون البيجاما
وانا اللي عشقتك من غير كلاما ،بالإشاره حرقتِ قلبي المفتونا
عَ الأبجد هَوّز عَ الأبجد هَوّز ، يا ربي تكبر البنت وتتجوّز
حرام عَ الفاضي تظلها تتهندز ، هذا ما هو شرع ولا قانونا
يا للي محرمتك بالريحه رنخانه، حرام لِقلوب تخليها غرقانه
قلوب الشباب جريحه وهيمانه ، حطي عليها لبخة طيونا
تقرأ بلهجة أهل سنجل