دلعونا- 50
نماذج تراثية وجدانية من الغناء الشعبي الفلسطيني
نظم وتأليف : الداعي بالخير صالح صلاح شبانة
على دلعونا يَمِّ الشاليشِ ، قرمولك عَ الصِدِر مثل الحنيشِ
محسوبك عَ شبر ميّه بطيشِ ، ان شاف عيونك وهمه يتغمزونا
سمرا وسمارك قهوه حجازيه ، الله يجازيكِ شو عملتِ فيّ
ذبحتِ قلبي وما قلتِ خطيه ، شايب وبالهوى مدلهونا
من كرم العنب لكرم التفاحِ ، أسرتيني وسلمت سلاحي
واعطيتك نفسي وانا صاحي ، مثل ما بالجنون بترمونا
يا للي طليتِ من ورا الطاقه ، حلوه وجميله ونارك حَرّاقه
أخذتِ القلب وأشعلتِ أشواقه ، وما سعدنا بزياره تزورونا
زوريني زوري بطفيك منامي ، لذة العشق تحَلِّق بالأحلامِ
وانتِ حبي وعشقي وغرامي ، اعطونا الحق ولا تظلمونا
شفت الصبايا وردن عَ الميه ، يقطرن مع الدلال رقه وحِنِيّه
غريب وما حدا عطف عليّ ، وقالت لها لشايب نظره حنونا
على دلعونا وخدودك يا لطيف ، ولاّ الوجنات الحلوه والشلاطيف
لا تظني اني بآخر الخريف ، قلبي ربيع وبنبت حنّونا
على دلعونا يا سمرا يا سمرمر ، يا للي خليتِ القلب يتحَسَر
والعقل شارد وفيك يتحيّر ، والنفس تصبو والنظره مفتونا
على دلعونا واللي فرّق يجمَع ، يا أغلى من الدمعه في المدمع
أنا بستدعي والمولى بسمع ، يقرني قاضي الشرع بالمزيونا
تقرأ بلهجة أهل سنجل
