دلعونا- 51
نماذج تراثية وجدانية من الغناء الشعبي الفلسطيني
نظم وتأليف : الداعي بالخير صالح صلاح شبانة
على دلعونا ويَمّ الجديله ، تايه وما باليد حيله
وانتِ أصيله وبنت أصيله ، وقلبك قاسي وما هو حنونا
تحت الخرّوبه تحت الخرّوبه ، وأيامي فيك مش محسوبه
بيضا ومحّمَرّه من حَر الشوبه ، سمرا ومحلا سوادِ لِعيونا
ما احلا المخمل لِمطرز عَ الجورجيتِ ، يَمّ الجورجيتِ خرَبّتِ بيتي
يا ما ناديتك وانتِ ما اجيتِ ، يا ست الحسن والحلا يا مزيونا
عِدّي رجالك عِدَي يا حليمه ، في الصيف ما عملوا غنيمه
وقِعِت فيك واجت سليمه ، نفدنا من عيونك المفتونا
يا ما وقفنا عليك ننادي ، نتشَرَّف بالقرب وطلب الأيادي
شربنا الهندي مع المحيط الهادي ، وبكلمه ما فزنا منك يا مزيونا
حبي سارح في الخلا والبراري ، وبصَيد غزلان وأرانب وحباري
حرقني وفي حرقتي ما هو داري ، صادني بالفشك وغمز لِعيونا
عيني يا عيني عيني عليها ، قضيت العمر أداري فيها
هي اللي باعت وانا اللي شاريها ، قلبي لِمعَذّب عليها حنونا
لنصب عَ العين فخه وانطر الفرخه ،أنطر الحلو اللي للشعر أرخى
وما ظني بنت شيخ البلد تِسخى ، تذبح العاشق بسود لِعيونا
سمرا يَمّ عيون بتِوّسَع ، خلتني مهدبد ما بقشع
يا ربي يا للي شايف وبتسمع ، خذ لي بحقي من المزيونا
عَ حرف الأليف لففتني عَ حالي ، يا دم القلب من الجرح سالِ
يا رب تسَلِّم حبيبي الغالي ، أم الشفايف اللي بتبسمونا
لشرَب من نبع المحبه ميّه ، أغرف واشرب بحفنات ايدَيّ
يا رب تسعد ها لحلوه الصبيه ، اللي خلتني شبه مجنونا
تقرأ بلهجة أهل سنجلّ