دلعونا- 53
نماذج تراثية وجدانية من الغناء الشعبي الفلسطيني
نظم وتأليف : الداعي بالخير صالح صلاح شبانة
هلا ومرحى بدلعونة الدلاعين ، بالحلوه اللي ذبحتني مرتين
مرّه بالرمش وسحر العنين ، ومَرّه بسكين الهجر المسنونا
حالي وأحوالي منك مش تمامِ ، دلهتيني بسحرك وما قلتِ حرامِ
لا تمر الجزيره نلنا ولا عنبِ الشامِ ، وما أخذنا إلا دمعه بالعيونا
جُرّي الكحله عَ الجفن الجارح ، ولاقيني مطرح ما التقينا انبارح
ما احلا الغزال اللي عَ الحقله سارح ، خفيف الخطوه مكحول لِعيونا
قلبي رقص لك عَ الدَقّه ونصِ ، إنتِ بتحكي وانا بهُصَ
بعد المنازل سكنتيني بخُصِ ، ودورتيني تايه مجنونا
الله يا ربي تسعد لي ها لطله ، غزاله كحلا وسرحت عَ الخلّه
خليني من حُسّنِك أتملا ، ولا تخلي قلبي محزونا
قوليلي شو ها لسيره يا سمرا ، نشوفك في السنه مَرّه
كل ما سألنا قالوا لنا بَرّه ، تصّيِّد حباري وطيور الحسونا
اسمك في الدفتر أحلى الحلواتِ ، ذُبْتِ في قلبي سكر نباتي
مقرونه بعمري وحياتي ، أجمل ما فيكِ ما في الكونا
بقيتِ فيَّ آهاتي وجوّه روحي ، تنبض آهاتك من جوّه جروحي
انتِ في القلب سِرّي وبوحي ، انتِ لمسة مَلَك حنونا
على دلعونا يا سمره يا اسميره ، مثل سمارك ما شفنا في الديره
عرشك عَ القلب هيه يا أميره ، بتهنى القلب بالسمره المزيونه
على دلعونا يَمّ الجَدّوله ، من حر الشوبه بالعرق مبلوله
نغمه عَ صوتي محموله ، كل ما قلت على دلعونا
شفتك بتملي من البير الغربي ، شلعتِ بالشوق والحسره قلبي
رفعت ايدي للسما وقلت يا ربي ، نوِّلني ها لسمرا الحلوه المزيونه
تقرأ بلهجة أهل سنجل