نسرين
بقلم : الداعي بالخير صالح صلاح شبانة
صورة وجدانية عاطفية مهداة لشمس العرب
Shabanah2007@yahoo.com
نسرين اعذريني ، اذا ما شفت غير هذولاك النسرين ، النسر اللي هَدّا ، والنسر اللي طار
ونسرين اللي زرعت في القلب راس السهم ، اللي انغمس جوّه القلب ينزف دمي الحار
نسرين اعذريني، بقيت أعمى، أتمايزك من هان وهناك ، ومنعمي عن السحر والأسرار
اللي بنقط من عيونك ، تصرخ فيَّ فيها انثى ، مثل غيمه في السما تعتصر الأمطار
كل ما انتهى عُمُر افتراضي للأنسان ، وانغمس جواها ، بورشة حلم ، بتجدد الأعمار
نسرين ام النسرين ، النسر اللي هَدّا والنسر اللي طار ، والنسر اللي مهَدّي عَ قنطرة المنطار
يحمي الكرم .. من كل طير مستأنس وجارح ، من كل دبعي غدّار
********************
نِسرين هدّت عَ القلب مثل نحله ، وارتجت أعصابي تحت اللسعه ، وهِمِت في عيونها مثل لِبحار
وتلاطمني موج مجنون ، وهِمِت بسمارك الحلو ، وببسمه قامت تحتيها حفلة زار
إشي بطبل وإشي بزمر ، إشي بميجن اشي بدلعن ، اشي بخلع العقل ، اشي بزلزل الدار
اشي بطل من الغيم ، اشي بنزل عَ الأرض ، اشي برش ميه ، اشي بشعل في هوايا نار
وسألت حالي : يا ترى ؟؟ أول مره بتشوفها ؟ لأ، شفتها كثير ، بدل المَرّه مَرَّه وامرار
بس ما بقت مثل ها لمرّه أنثى ، ذابت فيَّ ، تململت في قلبي وعينيّ ، وجرحتني بسيف بتار
وسجنتني على شواطي رموشها ، وتهت جوا عنيها تايه محتار
***********************
نسرين حلمك عَ القلب ، قلبي مش حِمْل جوزعيونك ، عيونك محروقة حرسي ، فيها سحر جَبّار
فيها أسطوره تكشفت ، تحت بسمه عَ شفافك قتّاله ، فتاكه أكثر من جيش جرّار
فيها سحر مغلف بقسوه ، قبضة حديد ملفوفه بحرير ،زرعتني برهبه وخوف مثله ما صار
فيها آهات عَ دقات القلب مبعوثه ، تجري ، تتسابق ، نهرها جاري مجنون ، صوته هَدّار
خايف يسحبني بتياره ، وجسمي واهن وقلبي أوهن ، وحيلي أضعف ما يصارع ها لتيار
نسرين ردي عيونك ، عيونك قتلتني ، ذبحتني ، خلتني مَكْسَر عصا للمرجله ، عَ زير الفخار
خلتني تايه ، ملفوف ، مستسلم ، موقعلك إقرار
***************************
نسرين اعذريني ولا تسأليني ، وين بقت عيوني ..عن سحرك لِمغلف بالرقه وبقدح شرار
وليش إتأخرت عَ الباب ؟ بس أنا معذور ، بقت ابوابك مسكره ، و عَ كل شباك مسدول ستار
واتغلفتِ جوّه علبة صدف، وما ورجتيني الجواهر والدرر ، ولا الياقوت واللولو والمحار
ظليت تايه أدور عليك ، بعيون البنات ، بعيون العذارى ، اللي رمتهن بدربي المقادير والأقدار
بس لمّا كسّرت الثلج من حواليك ، وحسيت الدفا بفط من عينيك ، وقربتيني وصرت إلك جار
وصرت أتسلل مثل نسمة بحر نديه ، أحوبس حواليك ، أشم انفاسك ، كل ما غابت شمس نهار
واتحفتل حولك وحواليك ، وادندنك مع فيروز (سهار بعد اسهار)
يا نسرين ، يا نور العين ودموع الغين ، يا مشعلله في القلب نار
تقرأ بلهجة أهل سنجل
10/9/2000
