اطلالة فجر
صور وجدانية عاطفية محكية
تأليف : الداعي بالخير صالح صلاح شبانة
Shabanah2007@yahoo.com
بكره لمّا يطل الفجر من عتمة الليل ، ويزقزق عَ الشجر عصفور
رح تلاقيني عايش فرحة الفجر ، تحت شبابيك حبك ألف وادور
وبزرع الأرض خير بخطواتي ، وبغلِّف بالفرح آهاتي
وبطيّرها إلك عبق وشذى ، مثل رحيق الزهور
وبكره لمّا يطل الأمل من عيونك يناديني ،
رح تلاقيني قشه في مهب الريح ، مش مصدق حالي ، مخربطه أحوالي ،
يفج الفرح من عينيّ يرقصلك ، ووجهي يطفح بالنور
ورح تلاقيني شفاف ، صافي نقي مثل البلور
**********
بكره لمّا يشقشق الفجر ويطلع النهار ، وتتفتح كل صناديق الأسرار
ونتلاقى أنا وانتِ عَ الوعد ، ولمّا تحطي كفك بكفي ، وتصوبيني بنظره ،
مثل رشق الموزر من عيونك اللي بتقهر جيش جرار
ساعتها بحس إنك مثل الميه ، طفيتِ مني حرقة النار
وزرعتيني مثل الحلم في بستان قلبك المعمور ،
واني انهزمت قدام طوفان حبك ، ورجعت مثل البطل منصور
**********
كل ما شفتك ، كل ما سمعتك ، كل ما تخيلتك ، بغرق في بحر آمال
وبتململ تململ العليل ، وما فيّ عله إلا سهم منك قتّال
وقلب من ثقل الحمل ، من الهجر والحرمان مكسور
بتمنى لو انه قصر من قصور شهريار ، بوجودك ببقى معمور
**********
بكره لمّا يطل الفجر ، واشلح مع الفجر عباة الظلام
واراجع حالي ، وأحوالي ، واحط شمسيه تحميني من رش الأحلام
واتواقى من لِعيون اللي بترشقني سهام ،
واتحرر من زوايا الحبس ، من الظلم والجور،
حتى لو عذابك أحلى عذاب ، وحبسك في لِقصور
لأظل اناغي الحريه ، واطلقها آهات على مناقير الطيور
**********
بكره لمّا يطل الفجرمن عتمة الليل ، واحمل آهاتي إلك مواويل
وافتحلك قلبي مثل تِلِم في الأرض تزرعيه حب وحنيه ، وتغِّل المحاصيل
وأمسح الكآبه بصبيب الندى ، ومثل حوض النعنع انعنش فيك بهجه وسرور
تقرأ بلهجة أهل سنجل
http://turath.mo5ayam.com/vb/index.php
منتديات سنجل الباسلة
الموقع الشخصي للكاتب والباحث صالح صلاح شبانة
هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .
