شفتك يا سمرا
بقلم : الداعي بالخير صالح صلاح شبانة
صورة وجدانية عاطفية محكية
Shabanah2007@yahoo.com
شفتك يا سمرا ، وانتِ شايله الزيت والشرار ،
وانتِ ناويه عَ جنوني ، وانتِ تشعلي في القلب نار
شفتك من ما نط العصفور عَ فرع الشجره ، اللي عَ راس المنطار
وبَغَم وبَرّجَم ، بأول لحن من ألحان اليوم ، والندى لسه مبلل اللحاف
والشبابه اللي عَ جنب الراعي مبلوله بالصبيب ، و متحمم بالندى المزمار
بعد ما صدَح أحلى الأنغام ، وأروع الألحان
وشعر الراعي اللي عَ جنب الصيره ، مبلل بالندى اللي بلل لِفراش
قبل ما شد العصفور جناحاته وطار
**********
بقت النجوم يا دوبها بتودع، وبتندحر ، وبتختفي قدام ضوّ النهار،
والشمس بتفوح بالدفا ، وبتصب حَرّ نارها وسعارها على الصَرار
تيصير مثل رضف الطابون ، اللي في القلب يشوي آهاتي على النار
**********
يا ترى..؟؟ أحمل آهاتي وارحل ، واودِّع العِزِب والمنطار ..؟؟
واخلي العصفور يغني للشجر ، لغيوم الصيف المارقه...!!!
كأنها دوريه ، عَ غير هدى وقرار ..!!!
تمشي ، وتمشي ، تيتوب القلب عن الحب...!!
ويتوب اللسان يغني للسُمُر والسمار..!!
قولليلي يا سمرا ، يا غاطه القلب بالزيت ، ومشعلليته بالنار..!!!
تقرأ بلهجة أهل سنجل
