وصايا ستي
الحقيقه
وصايا مفعمة بالحكمة الشعبية بقلب ونبض ستي
بقلم الداعي بالخير : صالح صلاح شبانة
Shabanah2007@yahoo.com
بقت لستي رحمة الله عليها تجربه عميقه في نفسيات البشر ، وبقى عندها فراسه قلما تخيب ، وبجوز لو لحقت زمن العلم والتعليم كانت دشرت ذكرى محفوره بالصخر ما بتنمحي أبدا ..!!
بس أخذت من الحياه ، وتعلمت ، ومن حُسُن حظي إنها بقت تعطيني ها لعصاره المركزه من الخبره ، ومن المعرفه على شكل ها لوصايا الثمينه ...!!!
قالت لي ستي : شوف يا ولد ، عندك ناس بحكوا عن الحق والحقيقه ، وبعضهم بدَوِّر عليها دواره ، والحقيقه مش مطلسمه بالسحر ، أي واحد بدور عليها بيقيني رح يلاقيها ...!!!
في ناس بدّعي انه بدور عليها ، بس ما بده اياها تبين مشان كذبه ودجله والذي منه ما يتكسر تحتها ، ويذوب الثلج ويبين اللي تحته ، أو (يذوب الثلج ويبان المرج) أو تبين له (القرعه من أم قرون) ، فبقولك (حط راسك بين ها لروس وقول : يا قطاع الروس) واللي بجري عَ الناس يجري عليك ، وعلى رأي المثل : (يا خبر اليوم بمصاري بكره ببلاش)...!!!
الحقيقه يا ستي مرات بتبقى مُرّه مثل الحنظل ، بقدر ما ببقى النفاق والكذب حلو ، بس الحقيقه خالده فيك للأبد ، والكذب حبله قصير ، ولما ليله ينجلي واتطل شمس الحقيقه تبدد أوهام الكذب ، بعدها يا وقعة السلامه ...!!!
اذا بدك تتعامل مع بني آدم ، كان بزراعه ، أو تجاره ، بدك تراعي الحقيقه واتدَوِّر عليها ، أحسن لتجيب الدب لكرمك ، وتجيب مين يقلع شروشك ويرميك لبره ...!!!
اذا بدك تناسب واحد جيب حقيقته ، لأنه النسب اختلاط دمك بدمه ، وبده بكره يطلع في دم سلالتك ، فقبل ما تشوف لحالك مره ، شوف لولادك مخول يشرف ، لأنه الخال طوبار ، واختار الطوبار لِمليح لتنهد لِبنايه عَ راسك ...!!!
بس تكبر يا ستي وتتعلم شو هي الحياه ، رح تشوف انه حبيبك اللي نصحك وحسبته عدوك لأنه قالك اللي بخالف هوى نفسك ، وهوى النفس كذاب ، ورح تقول مثل ما قال غيرك : (الله يسامح أبوي اللي ضحكني ، ويرحم أبوي اللي عيطني)...!!!
الحقيقه انه البني آدم ما بحب حدا أكثر من ابنه ، ولا بحب حدا يبقى أحسن منه غير ابنه ...!!!
وفي بعض آباء قاسيين وطبعهم قاسي ، وتربيتهم قاسيه ، بالحديد والنار ، والظلم ولِسعار ، ومع ذلك بخلق من ابنه رجل مُر ، مش مايص رطروط يتمرجح مثل حبل الذبان ..!!
وبعضهم ما بميز ترباية خروف المرياع عن ترباية ابنه ، وعندك المراييع نصهن بفقع ، قبل ما يتشرف بحمل الجرس عن جداره ...!!!
حقيقة الدنيا مُرّه ، وطعم السعاده فيها بطلع من طعم العرق والكفاح ، من إيدك اللي بتشق الأرض ، من كتفك اللي بهبط تحت الحجر ، من عرقك المخلوط بالغبره والعجه ومرات الدم من جرح صابك ، وانت تمسح ها لعرق بكم قميصك ، وانت ترزح تحت ثقل الحمل ، لأنه اللي فيه هذي الصفات فيه ، فيه صفات الكرامه والعزه ...!!!
وبعيد عن اللقمه التافهه اللي بستسيغوها بعض الناس ....!!!
الحقيقه المُرَه اللي بتصنع منك بطل ، وبتخليك رافع راسك لفوق ، ونظرتك عاليه مثل نظرة الصقر ...!!!
الحقيقه هي اللي بتخليك تتجرد قدام نفسك من الأوهام الكذابه وتعتلي ظهر الحياه مثل الفارس البطل وتقطف ثمرة الحياه بنفسك وبقوة عزمك ...!!
الحقيقه هي اللي بتعطيك قدر نفسك المزبوط ، وقديش حقيقتك ، وبتقعدك بالمقعد اللي هو الك من غير ما يبقى مبهبط وواسع عليك ، وبدون ما يبقى ضيق وحاشرك جواه حشر ....!!!
اذا عرفت الحقيقه ، وتبعت نهجها عمرك في حياتك ما بصيبك ضيم ، ولا حدا بعتدي وبسرق اشي من انجازك ، ولا بتورث اولادك العيب أبد الدهر ...!!!
الحقيقه الوحيده اللي اذا اتبعتها بتعيش بطل وبتموت بطل ...!!
وسلامة فهمك يا ستي ....،
