وصايا ستي
الصبر
وصايا مفعمة بالحكمة الشعبية بقلب ونبض ستي
بقلم الداعي بالخير : صالح صلاح شبانة
Shabanah2007@yahoo.com
قالت ستي الله يرحمها :اسمع يا ستي ،الصبر هو ميزان البني آدم ، والحياه من أولها لآخرها إسمها الصبر ، ومعناها الصبر ، حتى ولو اختلفت الأسماء ، العفه صبر ، الحِلِم صبر ، والشجاعه صبر وغيرها وغيراتها ...!!!
إقلب كل معنى بتلاقي مكتوب عَ وجهه الثاني صبر ، والصبر فضيله كبيره يا ستي ، مش كل من طلبها نالها.....!!
فا لزلمه الطيب وان شا الله تبقى زلمه طيب ، اللي بصبر على نفسه وما بتصبر الناس عليه ، إذا إنك طيب أصبر على نفسك ولا تترجى فلان وعلنتان ، وتصير مديون إلهم ويصبروا عليك ، واذا صابك اشي من الله سبحاته وتعالى ، اصبر على حكم ربك ولا تجزع ، لأنه الجزع ما برجع اللي فات وبحرمك من الأجر والثواب ، وبعدين لا تعمل مثل اللي قال : (ان حكيت للجار عَيَرني ، وان صبرت للدهر حيَرني) ،اصبريا ستي على حكم ربنا ، ولا تخلي الجار يعَيّرَك ولا الدهر ايحَيّرَك ، وبعدين يا ستي الدنيا فيها القوي والضعيف ، وفوق كل واحد أقوى منه ، أو أعقل منه ، أو أظلم منه ...فإذا واحد مش قدرتك عليه اتنازله ، اصبر على حكم ربنا ، والمثل بقول (اللي ما بتقدر له أصبر له)، والشجاعه يا ستي صبر ساعه ، والشجاعه مش بس في الحرب والمنازله وانت حامل السيف والرمح ، الشجاعه في القرار الصح ، في كلمة الحق ، في الموقف اللي برضي وجه الله ، وانت عارف يا ستي الزمن كيف (شقلاب غلاب) يوم بتبطحه وعشره ببطحك ، بوخذ منك أكثر من اللي بعطيك اياه ، فا للي بصبر على تقلبات الزمن شاء الله يبقى من الفايزين ...!!!
وبلاوي الزمان يا ستي كثيره ، أكثر من الهم على القلب ، وما بفوز على بلاوي الزمن إلا الصابر ، بجعلنا الله من الصابرين ...!!
وفي ناس بقولوا : الضعيف سلاحه الصبر ، وأنا مش معهم ، الضعيف سلاحه الإهانه ، بس القوي الحليم الكاظم للغيظ هو اللي سلاحه الصبر ، وعمر الصبر ما بقى سلاح الضعيف ، لأنه الصبر هو القوة ، وهو التسامح عن فضب ومقدره ...!!!
أصبر يا ستي ، ما فاز باللذات إلا الجسور ، والجسور إللي بصبر على الخوف والضعف اللي في النفس وبقهرهن ، اصبر يا ستي لأنه (من صبر قِدِر، ومن صبر على عجف الليالي نال سمانها) ، اصبر على الجعيفه الضعيفه تتنال الناصحه لِمرَبرَبه ، اصبر يا ستي لأنه ما بنال العز الا من صبر ، ولأنه الصبر خير ، ولأنه حُسن الصبر يا ستي طليعة النصر ...!!!
ولا تنسى ان صبرت نِلت وأمر الله نافذ ، وان ما صبرت انقبرت وأمر الله نافذ ...فليش ما تتحلى بالصبر عن ايمان وقناعة ، وتنال الأجر ما دام أمر الله نافذ نافذ ..!!
كل مشاكل الدنيا يا ستي دواها الصبر ، إلا قلة الصبر ما إلها دوا ، فخليك الله يرضى عليك فطين ورزين ، وعلى هَمّ الزمان صبور ، و(اللي ما بتحالى بالصبر بهلك بالجزع) ، وبالصبر بتنال المطالب ، واللي (بتصَبَر بصبره الله) و(الصبر ضياء ونور) ، اصبر على أحوال الدنيا مثل ما بتصبر عَ الحصرم الحامض تتوكله حلو ، وتتصبر عَ الحر تتوكله بارد ، واعرف يا ستي ها لحكمه من ستك الختيارهاللي اكل الزمن عليها وشرب ، واللي بدي اختم لك نصيحتي فيها اه (الصبر مر ، وما بتجرعه إلا كل حر) ، وسلامة فهمك يا ستي