من وصايا ستي
أطباع الناس
وصايا مفعمة بالحكمة الشعبية بقلب ونبض ستي
بقلم الداعي بالخير : صالح صلاح شبانة
Shabanah2007@yahoo.com
زمان قالوا يا ستي ... الله يرحمك يا ستي إنتِ وها لمقدمة ، وها لبدايه اللي بتدخلي فيها للحديث .... زمان معناه في أشياء كويسه ، أنا ما بعرفها ، وهدفها تعرفني اياها ...!!!
زمان يا ستي بقت أحوال الناس غير عن ها لأيام ... ، ها لأيام الناس كل واحد في حاله ، كل واحد داير ظهره للناس ، ومش مستنظف الذبانه اتهدّي على منخاره ، بس زمان بقوا الناس للناس ، وللناس أطباع مطبعين عليها ، وزمان بقى كل واحد يعرف عن الناس قد ما بعرفوا عنه ، وبقوا الناس فنكريه كل واحد منهم (شنده عَ بنده) ...!!
وبقوا ناس كويسين ما بتخيروا ، وناس عاطلين بتبعهم ببلغه قديمه مقطمه..!!
وناس بتجاوروا وبتزاوروا ، وناس لا بتجاوروا ولا بتزاوروا ، وما بتعرف كيف ولا منين تلايمها ، فبتلاقي فلان بايعها بقشرة بصله ، (شمام هوا ، قطاف ورد) ، وهذا يا ستي لا بدك اياه ولا صحبته الفارطه ، لأنه صايع ضايع ، و(بلهي لِحمار عن عليقه) ، بقطع رزقة اللي برافقه ، وواحد مثل (صفيه المشتفيه) ما بِصَدِّق ويصير معك إشي مش مليح ، مشان ينبسط ويفرح في اللي جرالك ، وواحد (جربان وبسلم با لأحضان) ولك يا لبعيد خليها مخامسه وماشي الحال ، وعلى رأي المثل : (ش... وبده ينام في النص) ، وناس على رأي المثل (الردي ردي وكل ما جليته زاد صَدي) .. وناس غلباويين (حطه في الصدر بظل يزحف للعتبه لعند الصرامي) سلامة قدرك والسامعين يا ستي ...!!!
وعندك يا ستي (ناس بتنشرب مع الحنظل وملح لِنكليز من حلاته،وناس ما بنشرب مع العسل)!
وعندك ناس بحشوا مناخيرهم في اللي إلهم واللي مش إلهم ، وانت يا لبعيد شو اللي عاصص على ذنبك ومدّخلك في إللي ما إلك فيه..؟؟؟ وهذا مثل (اللي راح على جهنم قال حطبها أخضر) ،وناس يا ستي الله يعافينا ببقى راضع هو والشيطان مع بعض من صدر واحد ، هذا مصه وهذاك مصه ، ما بتخير واحدهم بالنجاسه عن الثاني وين ما إجا بدُّق أسافين وبولع نار المشاكل والفتن ، وإيده طويله شو ما إجا تحتها ولاَّ حواليها ، راحت كفك عليها سرقها ...!!!
وناس الله يعيذنا يا ستي ، إبن حرام مصفى ، يا ويل الناس اللي بخالطهم من شرّه وشروره ..!
وناس أسقع من الثلج .. من ليلي المربعنيه وسعد الذابح اللي ما خلاّ ولا كلب نابح بتلاقيه إيخُر بروده جوّه عظامك ... بتلاقيه إذا دخل في موضوع بصير يحطلك العرض في الطول .. ويلف ويدور ، ويعيد ويزيد من غير ما يعطيك زبده ولا ثمره، ولا يقطع خامر من فطير ، غير رزاله وقلة حيا ، وهي كل بضاعته من زاد الدنيا ..!!!
وناس ببقى مسحوب من لسانه ، بتلاقيه يجرح ويداوي ، بتلاقيه يكسر ويجبر ، مثل الزيبق ، ولاّ مثل ذنب الفار الغاطس في الزيت ، لا بنمسك ولا بنربط عليه، ملحلح ومدردح ، مضروب على مقفاه ميت مقرعه ، برقص وبمشي عَ الحبل من غير ما يوقع ، وناس مصلحجيه ، بصابح إذا مصلحته يصابح ، وبقابح إذا مصلحته يقابح ، مثل قرص عباد الشمس ، وين الشمس بتدور ، بتلاقيه معها بدور ، وناس بتلاقيه خفيف دم شوفة وجهه ولاّ وجهها بتحِل من الظهر أربعطعشر عقده ، وناس شوفتهم بتجيب الجراد من الصحرا ...!!!!
هيذ الناس يا ستي،من جبلة ها لتراب اللي اختارها ربنا سبحانه وتعالى لجبلة أبونا آدم وقديش من عناصر الطيبه والخبث بجبلة هذاك الإنسان ...!!!
أنا يا ستي حطيت ها لمناظر والأشكال قدّامك تتشوف اللي بناسبك وبواتيك منها ، وقلت أضوي ها لطريق قدّامك ، وعقلك في راسك تعرف خلاصك...!!!
وسلامة فهمك يا ستي ،
