قصة عُمر
صورة شعبية تراثية محكية
بقلم ووجدان : الداعي بالخير صالح صلاح شبانة
Shabanah2007@yahoo.com
كبشة تتن يا وليدي لها لغليون ،
ترى القلب ميت من جوه ، ومدخن ومجَمِّر مثل ها لغليون
ترى القلب يا وليدي امحشى أسى
وشو أقولك لمَّا أقول ، عن ها لقلب المحزون ،
آخ يا وليدي من اللي شفته ، لو الحكي يخفف شويه منه ،
وينشف الدمع من لِعيون ،
لفتحلك كل جروحي تشوف اللي فيها ،
تشوف ستك الختياره ، قد الزمن ما جرحها ،
جرح يا بنيّ ورا جرح ، ووجع يحمى فيها بجنون ،
حط يا بنيّ كبشة تتن في ها لغليون ،
واقعد اسمعني ، أغنيلك ، أهاهيلك ،
يا جبل ما يهزك الريح ، حتى لو كنت بالجن مسكون..!!!
********************************
مش كذب ، وحياة اللي حط البصر بعيونك ،
ستك الختياره ، بقت بنيه مثل النواره ،
وبقوا زلام البلد يتناحروا على شمه لها لورده ،
لها لفله لها لخفه والشطاره....
وستك يا بنيّ مثل القمره ، والله ....!!!!!!!!!
تتنطوز مثل العصفوره، مثل الكناره ،
عُمر شب ما قرّب من قلبي ،
وقلبي الميت لو شفته يومتها ، مسكر مثل ابواب العماره ،
ومحروس بالجن مرصود ...!!
وقلبي لو قربه واحد ساعتها ، لرميه يالحسره والندم والخساره .....!!!!!
*****************************
ووقعت ستك يا بنيّ في سيدك ،
وحسيته مسكني ، وهزني وهزني ،
وحسيت في قلبي اشي مثل الوجع ،
وما هو وجع ، ولا جرح ... ولا هو دلع ،
اشي مثل شبابة الراعي بنمنم في قلبي ،
اشي مثل الهبل ، مثل الجنيه ، مثل الصرع ،
اشي يا حبة عين ستك لخبطني ،
مثل مزراب كانون في قلبي شقع ،
حط كبشة تتن بها لغليون ، خلي كل الحكي اللي جواي مكنون ،
يفور مثل الزيت في المقلى ، واعطيني منك شوية سمع ....!!!
******************************
وصار مثل النحله يفر حوالي ويدور ،
وصرت اتثاقل واتضبضب من قدّامه ،
بس وين اروح منه ؟؟ وين أروح من حالي ؟؟
وكأنه قدر علينا مقدور
يوم يقرب من الدار يا ستي ، أحس في حشا القلب نار ،
ويوم يبعد ، أحس الحسره فيّ ، بتقرص قلبي مثل الدبور ،
وبعدين اجا هو وأهله ، وشوية ازلام من الحاموله ،
وما حسيت غير أبوي بباركلي ، مبروك والف مبروك يا ست بدور
إجا نصيبك لعندك ، وخطبتك ، وقولي سنه ولاَّ شوية شهور ،
والموسم يحل علينا ونفرح ، ونركب عَ النار قدور ،
والرب يتمم بخير ، و عَ الظالم الدواير تدور...!!
********************************
آآآآآه يا حبة عين ستك ، ما أكسل الزمن يا بنيي..!!!!
كأنه وقف وحط رجليه في قلوبنا ،
ها لموسم طول كثير ، وكأنه ما عَ باله ييجي يزورنا ،
ايفك حرف ولاَّ حرفين من مكتوبنا ،
وييجي خطيب البلد ، ويملك جيزة سيدك وستك ،
حسيت ها لعُمُر كأنه بضيع خساره ..!!!
وصرت أعيط على ها لزمن اللي بتكسر ،
وينته نتلاقى ونحقق مطلوبنا ؟؟؟؟!!!!!
**************************
وربك يا بنيي جابها ، واجا موسم كله خير وغلال ،
يا صلاتك يا محمد يا خزاتك يا ابليس ،
فار الزرع والعشب من الأرض ، وانسكب الخير علينا شلال
قطفنا الزتون ، وعصرنا الزيت ، حرثنا وبذرنا القمح في الأرض ،
وطلع السبل من الأرض مثل الذهب ، وعم الخير علينا ورزق الحلال
واللي قبّع يا ستي قبّع ، واللي ربّع يا ستي ربّع ،
يا زين الخير لمّا يدفق والجمال ..........!!!!!
******************************
ولخوا أول زغروته في الدار .... حسيت الفرح فيّ بطيرني ،
للغيم للقمر ، للشمس بوصلني..... وبطوّحني داير مندار.
ولبست ثوب العرس ، وحنوا ايدي ورجلي
وحملوني ع الفرس الشهبا ،ياما حلمت ع ها لفرس مشوار
لبيت العَدَل ،لعيون سيدك ..
ياما عيون سيدك شعلت في قلبي النار!
شفت يا بنيي الأرض العطشى ؟أنا الأرض وسيدك المطر!
أنا العشق اللي بقولوا عنه ،وسيدك جنحان السفر
صارت ها لدنيا غير ها لدنيا ،وصار العمر يركض
ما بعرف كيف اجا أبوك ،وإجت عمتك وإعمامك
وصارت الدار غوش وحركه
بس وحياة الله اللي أحسن من الجميع ،اللي ربطنا بمصير واحد وقدر
وحياة اللي ضوى الأرض بالشمس والقمر
ما شاف واحدنا ضيم من الثاني ،ولا القلق عمره ع بالنا خطر
وفي ليله يا ستي ،وعمري لو عشت ألف سنه
ما سحبت من بالي ها لليله ،ولا شفت منها نكده وطويله
صحي سيدك في نص الليل يلاهت .. طلب شربة ميه تطفي حرقه نار
شعلت في قلبه ،بقول حرقت حشاه مثل الفتيله
نطيت ع جرة الميه ،وعبيت الكيله
وجيت أسنده بذراعي ،أسقيه من إيدي
لقيته يا حسره ممدد مثل لوح الخشب
أثاري الموت سبقني عليه ،وشفت الموت في عيونه الكحيله !!
*****************************
لحم أحمر ،والله ما إنت جابرني علي ها ليمين
أبوك وعمتك وعمامك دشرهم برقبتي معلقين
ودشر غصه في قلبي الحزين !!
وما صدقوا اللي بعد نفسهم فيّ ،
اجوا يرشوا ع الموت سكر ،ويقولوا الورد ورد ولو بعد حين
ما بنكر يا ستي إني أنا ،أنا ..
عيني هن عيني ،بس الفرح منهن انطفا
ووجهي لساته مثل القمر ،بس الأمل عنه راح
صرت يا ستي مثل ما تجيب بنورة الضو
وتدهنها من جوا بشحار ،يوجع يقطع قلبي مثل السكين
قلت يا دنيا الله يغرك مثل ما غرتيني
مثل ما مسكتيني بإيد ورجل وطوحيني
مثل ما على طول إيدك رمتيني
الله يغرك يا دنيا يا غداره !!
سيدك بقى مثل الجمل ،هو الأرض ،والزرع والأمل !
في رمشة عين يا ويلي فقدته ،فقدت صوته اللي معي الدار
ووقعت في لبخه ،في حيص بيص ،ما بدري كيف العمل
***********************************
قلت أشد ذراعي وأشمر عنه ،غير ظفرك ما حك جلدك
سميت إسم الله ونويت ،ويا حزن جوا القلب دفنتك
إسأل الخلا يا ستي وكروم الزتون ..وأسأل موارس القمح والبيادر تقولك
قديش ستك تبعرث سبل ،قديش دقته بالحجر
مشان عرام قمح ،وقفة تبن وشوية قصل !
مشان رغيف خبز يسكت جوع أبوك وعمتك وعمامك وستك !
إسأل الأرض البور تقولك ..
قديش الشوك شرب دم من إيديّ ،قديش الأرض شربت من عرق ستك !
يا وجع قلبي يا ستي ما أطول الزمان ..
بقيت أقعد نصاص الليالي
بقى القلق يطرد من عيني التعب ويسرق النوم من تحت الأجفان
عيله بتوكل الوجه يا ستي ،وأنا وحيده ،بكافح لحالي ..
الا الله يرعاني بعينه ،والنبي العدنان
شو أقولك يا سواد عيوني ،لما أقولك عن الزمان ؟
شو عمل فيّ وجرّعني الحسره بالفنجان !
وبقوا يكبروا ،أولادي ريحة سيدك ..
شويه ، شويه ... وصار الأمل يطل من عمته الأحزان
بكره لِولاد بكبروا ،وبحطوا إيديهم ع إيديّ
وها لأمانه اللي حملناها بنوصلها ..
لما يطلع الحلم من جوّات العتمه ،يشقشق بالضو مثل الصبح يحمل معه الأمان
وكبر أبوك زين أخوته وأخته ،وطول عمره أول الفوج
قلت :يا جيب أمك ،إيدك ع إيدي انصارع أنا وإنت الموج
قال :يا يمه ،بدي أتعلم ،بدي أسرق الحلم من العمر قبل العمر ما يسرقني
بدي أخلي الفقر والعذاب تحتي ..ومثل العريس أقعد على اللوج ..
خليني يا يمه أوفي المشوار !
****************************
ومشوار ورا مشوار ،ياما أطول المشاوير ، عليه بتكبر ،وبدها مني
وأنا إم يا ستي ، وقلبي أحر من الجمر ، وأملس من الحرير ،
سبحان اللي قدّرني على ها لحمل ، سبحانه القدير ...
وصرت أخدم اللي بسوا ، واللي بسواش...
واغسل ، واحطب ، واحصد ، واعشب ، واقنب ....!!!
وصرت أحرم ثمي من اللقمه ، واحطها في ثمامهم ،
واسلي قلبي ، ياما سليت قلبي ، ظل القليل .. وراح الكثير ...
قلت : خليه يوفي الحلم ، ويوفي العِلِم ، ياما العلم خلاّ الأعمى بصير !!
****************************
كل حرف من شهادات أبوك وعمامك يا ستي ،
كتبته بعرقي وبدمعي وبدمي ،
كل حجر من منصب أبوك وعمامك يا روحي ،
بنيته من شوقي وعذابي وهمّي .....!!
************************
كبروا يا حبيبي ، ومصير كل الزغار يكبروا ...،
وفرحِت من كل قلبي ، فرح لو ظليت طول العمر أوصفلك كيف واسمّي ،
ما وصل الوصف للأحساس ،
ويشهد عليّ َربي اللي خلقني ، وكل اللي حواليّ من الناس ،
من ما ترّمَلت لمّأ فرحت ، زمن طويل قطعته ،
من أول طوبه بديته ، من الساس ،
آآآآآآآآآآآآآآه يا دنيا ، شو سوّينا ؟؟؟ وشو سوّيتِ فينا ؟؟
ظلينا نجري قدامك ، واترني ورانا اجراس ،
كبروا النشامى واتأهلوا ، وقالوا : أمنا في عيوننا من جوّه ،
سواد لِعيون مقعدها ، والجفون عليها حَرّاس ،
أطلبي يا حجه واتمني ، إنتِ الخير والبركه ، إنت الأرض ولِغراس ...!!!!
*************************
لو ظليت طول العمر أصلي واصوم واشكر ربي ،
ما وفيت بالحمد والتسبيح ،
ولا قدرت أعبّر عن اللي جوّات قلبي ...!!!
سبحانك في مكانك ....رب تعبد يا الله !!
أعطيتني صحه وقوة ، وطولة عُمُر ،
ودملت ها لجروح في النفس والتباريح ...
وتوجت بالخير أملي وحبي .....
كبروا الأطفال وصاروا رجال ، وراحت أيام وليالي الشقا الطوال ،
وياما صفقت في ها لدار الريح ....
بس الفرح طفا أيام الحزن ، وطلعت الشمس من ورا الغيم
وغنت الصبايا عتابا وميجنا وجفرا ، والعاشق الجريح ،
ظليت أغني للفرح يا فرح ، يا اولاد الأرمله يا للي سابقتوا الريح ....
مثل الشمس طفيتوا العتمه ، بس نسيتوا انه الدهن بالشمس بسيح ،
عبدتوا النسوان ودشرتوا الإم ، ها للي شقت الحجر با لظفر ،
تتعيشوا في عينيها حلم ، طول المدى ، طول العمر .....!!!!
*********************************
قول لإمك ونسوان عمامك يا ستي ، انه الزمن قلاّب ،
مثل الحلم بتنام وبتصحى ، بتلاقى وجه غير وجهك ،
بتلاقي نفس غير نفسك ، بتلاقي الحِلِم مثل الثلج ذاب ،
دنيا غدّاره يا ستي ، يوم بترفعنا وميه بتوطينا ،
وبتسحب الأمل من عنينا ...
يوم بتجذبنا ويوم بترخينا ، وبترمينا في لِغطيطه والضباب ،
****************************
شو أقولك يا ستي عن حالي ، وانت شايف كل أحوالي ..؟؟؟؟؟
شايف الهم .... والحسره .... والعذاب ؟؟
هات سبب للفرح يا ستي ، يطلعني من الخيال والسراب ،
خيبة أمل ستك كبيره ، دار وحواليها صيره ، ما فيها شباك ولا باب ..!!!
*************************
امك ونسوان عمامك يا ستي ، لو قلعن شوكه من ايدي ....،
لو مسحن زخة عرق عن وجهي ....لو شافن الدم اللي شرشر من رجلي ...
لعرفن انه الله عادل ، ولازم يعدل الميزان....
لعرفن انه الله حق ، وانه مثل بمثل بعامل الإنسان ،
بكره بتكبر يا ستي ، وبتتجوز ، الله يمد بعمرك ،
وبتشوف بلاوي ، ومصايب النسوان ، ولازم امك تدفع مثل ستك ..،
والسعر من ثمن لِبضاعه ، حكي معروف من زمان ،
من يوم ما الله مد الأرض ، ورفع السما ،
وحط عَ الأرض اخوف ...والآمان...
تقرأ بلهجة أهل سنجل
