يا بنت البلد
صورةعاطفية محكية من أجواء القرية
استخرجها من القلب و صاغها ونظمها
الداعي بالخير : صالح صلاح شبانة
Shabanah2007@yahoo.com
رمش عيني قلم ،ودم قلبي حبر
وخدك يا بنت البلد دفتر
بها لقلم ،بها لحبر ،خليني أكتب ع خدّك سطر
خليني أكتب صفحه ،أحفر حروفها حفر
واللي بينكتب عمره ما بينمحي
بظل ع الورق ،بظل ع خدودك
بظل ع الزمن ترويده بتزغروها عيونك ..
أبد دوم ...أبد دهر
*********
إيدي وإيدك يا بنت البلد ، خلي إيدينا سوا
تشهد علينا يا زمن ،
تشهد عَ العين اللي دمعت ، تشهد عَ القلب اللي انكوى
بنار ، بجمر ، بسعار ،بخد من الدمع ما أرتوى
بشومه تطلع مره فينا ،بنخوه تولد مره فينا
بحلم نعيش سوا ،بأرض توسعنا سوا
بليله مثل الكحل ...يوجوج فيها ضو القمر !
**************
اسمك كتبته ع الحيط ،وع شاهد القبر
اسمك كتبته في الغور ،وع حفة الجسر
اسمك غسلته ع مغسل المسيح بإيديّ هدول وبمية النهر
واسمك كتبته بقلبي من زمان ،ع ورق الحنا وع حب الرمان
وحبك بقى ضايع ،منثر هون وهناك
لميته حبه حبه ،لقطته زهره من كل بستان
وبعد ما صرتِ بأيديّ ،مجبوله بدمي
ما بعرف !!فجأه ،مثل الحلم ،مثل الرعد ،مثل البرق ...مثل الآااااااه
بتحمل أوجاع قلبي ،بتشطر قلبي شطِر
كل اشي بلمحة بصر ضاع ..
ومن يومها ،ليومنا ..لليوم اللي جاي ..بستنى وبعود قلبي عَ الصبر
ومصير ها لشمس تطلع ،ويدفق في عروقي دم جديد .
دم نظيف ،دم قوي ..يقطر فيّ وفيك قطِر ،
يا بنت البلد ،يا ست الناس ..يا أغلى عليّ من العمر !!
تقرأ بلهجة أهل سنجل