البغل والجرس
من نكشات العبقري زيد أبو قراد
بقلم: صالح صلاح شبانة
Shabanah2007@yahoo.com
يا جماعة الخير ، السلام عليكم ورحمة الله وبركاته ،
يعني الأشي الوحيد اللي بغيظك وبخليك تطلع عن الصدد ، لمّا تجمعك صدفه مع طبل بلدي أجوف ...صوت عالي وجوف خالي ، وببقى مضروب بحاله طبنجه ، وبساويلك حاله أبو العُرّيف ، وأبو المفهوميه ، رح يطلع منها براءة ...!!!
واذا ولا بد اذا بدها هيئة المحكمه اتلَبِّس المفهوميه فيه ، رح المفهومية تنتحر وتدفن حالها..!
هذاك اليوم جمعتني صدفة تعيسه مع واحد مُنَظِّر من هذولاك المنظرين اللي ثقافة واحدهم ما بتتعدى زمن البيضه والرغيف ، وعايش بأحلام السوربون ، ودرجات الدكتوراه ...!!!
يا لطيف الطف ما اثقل دم هذيك القعده اللي بتجمعك بهيذ وهيذاك ناس ...!!!
الجبر على الله بس ..!!
في بديهية بعرفها الجاهل قبل العاقل ، انهم اليهود مجتمعين ويد واحده لأنه بجمعهم العداء ضدنا ، وقادة العدو بعرفوا ها لحكي كويس ، وعشان هيذ همهم يحطوا عصي في عجلات السلام ... ليش يا زيد ابو قراد ..؟؟
لأنه السلام هو الخطر عليهم ، وعلى كيانهم ، ومش الحرب ...!!!
بس هات يا زيد أبو قراد فهِّم ها لطبل الأجوف ، اللي بقصد أو بدون قصد بحاول ينفث سموم فكريه ثقافيه في عقول الناس...!!!
والمشكله انهم مش كل الناس بفهموا وعبقريين مثله ، وهذا ذكرني بواحد أحمق مرق عن واحد بدير ناعوره على بغل وحاطط للبغل جرس ، فسأل النواعيري عن سر حط الجرس للبغل..؟؟!!
فقال له : ما دام وانا سامع صوت الجرس بعرف انه البغل بمشي ...!!!
فقال له الأحمق : طيب افرض انه وقف وصار يحرك راسه هيذ وهيذ ، وصار يحرك راسه يمين وشمال ..!!
فقال له النواعيري : ومنين أجيب بغل عبقري مثلك ...؟؟
وهذا أخونا الفاضل اللي منين نجيب للبغل عقل مثل عقله ..؟؟!!
لأنه حديثه بنفس عقلية هذاك الأحمق ، ولو في عنا قانون عيب مثل قانون المرحوم أنور السادات ، كان حطينا في ثمه لجام وشكمناه مشان ما يفتحه ، وما ينفث سمومه القاتله ...!!!
أنا يا جماعة الخير يعني مش قادر أفهم ليش ها لناس هذول بعرضوا حالهم ، وبحاولوا يبَرِوزوا صورهم لِمعتّمَه ، ويظهروا أنفسهم انهم علماء وفلتات زمن ، ومجربين وفهمانين ، مع انهم وللأسف الشديد ما بعرفوا الفتحه من الشدّه ...!!!
إذا الأرض بتشهد كل يوم على حقائق ، ليش إحنا نزوّر هذي الحقائق..؟؟
نحكي عن الرشوه مثلا ، أنوه مجتمع ما فيه رشوه ..؟؟
كل المجتمعات مغموسه بالرشوه ، بس الفرق إنها بتحاسب بعض المسؤولين المرتشين ، وبعضهم محصنين ضد المسائله ، والمجتمع الإسرائيلي غارق في الرشوه لذنيه ...!!!
ومش معنى انه الكنيست حاسب اسحق رابين ومرته على مبلغ بقى في حساب لئيا رابين في أمريكا دليل على نظافة وشفافية المجتمع الإسرائيلي ، لأن هذي حاله وهذيك حاله ...!!
المجتمع الأمريكي من أكثر المجتمعات اللي الرشوه فيه سائده ...ومش معنى انه الشعب بينتخب كل أربع سنين رئيس بديموقراطيه ، مع انه اللي صار بين بوش الأبن وآل غور ، بحط علامات استفهام كثيره ، لأنه المجتمع في حاله ثانيه ...!!!
واحنا قامت ولاَّ قعدت جزء من التركيبه العالميه ، الا اننا بنتميز عنهم بقواعد مش موجوده عند غيرنا ، مثل العيب والحرام ، واللي هي من روح الأسلام ، واللي بتحول بيننا وبين أخذ الرشوه ، وبلعها هنيئا مريئا مثل ما بتعمل المجتمعات اللا دينيه وبالتالي اللا أخلاقيه ، لأنه وين ما انوجد الدين انوجد الخلق .!!
وانه كل واحد بعادي أمته وبتمنى الها الخراب واليباب ، ببقى عامل تدمير ومسمار في نعشها ، وببقى خاين لمبادئها ، حتى لو زعل منها ، وحقد على مسؤول سيء ، فهذاك المسؤول فرد لا يمثل الأمه ولا تراثها ولا ماضيها ولا حاضرها ومستقبلها ، واذا حقدت بحقد عليه وعلى اللي سلطه على رقبة الأمه...!!
عيب عليك يا شخص انك توجه المديح للأمم غارقه بالرذيله ، على حساب أمتك ، واللي بعملها ببقى طبل بلدي أجوف ساقط الهمه ، واحنا أصلا ما بدنا ها لأشكال لِمعفنه ...!!
وخاطركم مع السلامه ...،