العقوق
من نكشات العبقري زيد أبو قراد
بقلم: صالح صلاح شبانة
Shabanah2007@yahoo.com
يا جماعة الخير ، السلام عليكم ورحمة الله وبركاته..
هذا يا جماعة الخير قضية العقوق قضية شائكه ، صعب الواحد يمرق منها مروق الأصبع من الخاتم ، انه يطلع صاغ سليم من غير ما يتجرّح ويتخرمش ، وتصيبه بعض البلاوي ..
وقضية العقوق قضيه مشتركه ، سببها الآباء والأبناء مع بعض ...!!
وسببه اختلاف الأجيال والعقليات ، بس للأباء فيها دور كبير ، لأنه الواحد منا بحب يحتوي اولاده جوّاه ، وبحب انه ابنه يبقى نسخة كربون ، أو نسخه مصوره عنه ، لأنه استعمال ورق الكربون انحسر شويه مع تقدم (التنك لوجيا) على رأي زميلي المرحوم مرزوق الطبره ...!!!
ربنا سبحانه وتعالى خلق الأباء للعطاء اللامحدود ، وخلق فيهم حب منقطع النظير لأبنائهم ، ولولا هالحب هذا كان الأرض خربت ، وما اتعمر فيها بيت واحد....!!!
وخلق سبحانه وتعالى الأبناء غير مباليين ، وما بحسوا بأحاسيس أبائهم غير لما يتأهلوا ويخلفوا ، ليش ..؟؟!!
لأنه بظل يشك في عواطفهم وأحاسيسهم ، رغم انهم الآباء بحبوا أبناء اولادهم ، مثل اولادهم ، وبجوز أكثر شويه وخصوصا وهمه أطفال ، لأنه وقت ما بقوا اولادهم أطفال بقت الأشغال وأحوال الدنيا شاغلتهم ، بس لما هبط وراح زمانه الماضي ، تفجر حبه وعواطفه لأحفاده ، إلا إذا اميات ها لأطفال بعيد عنكم صرامي عتيقه ، الله يلعنهن قد ما بنشرن السوء والفرقه وبفسخن العيله تفسيخ ، وخصوصا اذا الزلمه اللي هو الأبن مركوب ، وموافق على كل حقارات الست الهانم مرته ...!!
وربنا سبحانه وتعالى ما وصى أب بأولاده ، لأنه غرس حبهم فيه وخلاه فطره من الفطر الأنسانيه ، بس وصى الأبناء بالأباء ، لأنه سبحانه ما غرس هذيك الفطره فيهم ...!!!
وربنا سبحانه وتعالى مثل ما فطر الأباء على العطاء اللي مش محدود ، فطر الأبناء على الأخذ اللي مش محدود، ومثل ما فطر الأباء على الحب اللامتناهي ، فطر الأبناء على اللامبالاه ...!!!
فا لأب لازم يعطي قد ما ربنا ايقدّره من غير ما يحس انه برمي ما بملكه في الأرض ....!!!
بس اللي بحدث انهم بعض الآباء ببقوا منانين ، يعني هو بعطيك بس بشعرك إنك تافه ، ولا إشي ، وانك مجرد شئ بملكه مثل ربّاط كندرته ، وما بحسس الأبن بقيمته ومكانته ، نازل فيه تقزيم ، مثل الشاكوش النازله ضرب على راس المسمار لمّا يختفي أثره بالتمام ...!!!
وهون لما الأب هز شخصية الأبن وبعدين مسحها بصير الأبن يشعر بنفور من هذاك الأب ، وعدم رضى وقبول منه ، وبعدين بصير يبعد عنه ، وبتتبلد أحاسيسه ناحيته ، وبعدين بصير يكرهه ويتمنى اليوم اللي يقبره فيه ، بعد ما سَوّد حياته وقتل شخصيته ...!!!
جايز الأبن ما يجاهر في ها لأحاسيس ، بس ممكن تخطر على قلبه ، وبعدين بترحل وبتسكن جوّاه لمّا تعشش فيه ، وتلاقي تشجيع من الشيطان ايظل ايوّز النار تحتها تتخرب مالطا ...!!
ومجرد الأستسلام والتلذذ في ها لهجسات والخواطر عقوق ...!!!
فيا الأب المحترم ، ربنا شاء انك تعطي بلا حدود من غير ما تترجى يرجعلك اشي ، بس لو انك أحسنت التربيه والأدب ، وما دفعت اولادك للعقوق ، كان ما صار فيك هيذ ....!!!
ابنك بدك تظل تعطيه لبين ما يشق طريقه ويستغني عن قرفك ، وبس الله يرحمك بتروح على القبر عاري حافي جوّه ذراعين ها لِقماش الأبيض ، وبعدين قد ما بقى أبوك يعطيك بدك تعطي ، وابنك بده يعطي ابنه وهذي سنة الله في خلقه ليوم الدين ...وماهي واقفه عليك لحالك ، كون وعامر ، فيك بلاك عامر ...!!
اذا ابنك طلع عاق لازم يبقى في سبب والسبب أكيد فيك ، يا اما انت بقيت عاق ، يا أسلوب تربيتك غلط ، يا ماعرفت تختار مرتك ، فطلع العرق دساس ، يا اما الف سبب وسبب تفضل روح دوّر عليهن ...!!
وخاطركم مع السلامه..،
تقرأ بلهجة أهل سنجل
