دلعونا- 58
نماذج تراثية وجدانية من الغناء الشعبي الفلسطيني
نظم وتأليف : الداعي بالخير صالح صلاح شبانة
سمرا وسماره يا قهوه مُرّه ، يا ريتني الفارس وانتِ المهره
يا للي مليتِ القلب حسره ، شوقي يحرقني جوّه اللتونا
لمّا تلاقينا ذيال البيادر ، القلب ملّوع والبخت خاطر
الله يا ربي تجبر الخاطر ، واتهَنّي القلب بأسمر اللونا
على دلعونا والعدس فاير ، والقدّره تبقبق بين الطناجر
ترى يا ستي الجوعِ كافر ، فتّوا الكرامي وفيها لاقونا
زيت وزيتون ودُقّه وزعتر ، أكله هنيه اللهُ أكبر
عليها بنتعَشّى وعليها بنِفّطَر ، صِحّه وهَنا للي يوكلونا
حملت جونتها ونزلِت عَ الوادي ، تضرب عتابا وشروقي وقرّادي
أعشق هواها من ريح بلادي ، شِفا ودوا للي يشمّونا
على دلعونا يَمّ الجدايل ، تِسوي الحاموله وسَبِع حمايل
وانتِ الأصيله بنت الأصايل ، نوّر عَ خدودك ورد الحنّونا
يَمّه ويا يَمّه عيني عليها ، ورجتني العالم جوّه عنيها
للرّوح إن انوَجّعَت هيّ تداويها ، تعطيها روشيته بغمز لِعيونا
إطنعشر طُبَّه حطت عَ القبّه ، رسمت عليها رموز المحبه
بدها تعويذه مع شقفة شبّه ، والخرز لِزّرَق يرد لِعيونا
الكف الأحمر محَنّى بحِنّه ، وخدود البيضا تنقط بالفتنه
حبك يا بيضا والله جننا ، وخلالنا العقل تايه مجنونا
معلق يا قلبي بحب الصبايا ، ريتك يا حلوه سِعّدي وهنايا
إنتِ ضميري مثل لِمرايا ، أشوف بطيفك نظره حنونا
أيام العُمُر تمشي وتجري ، حُب الصبايا فقدني صبري
ربي يا عالم شو اللي بصِدّري ، اتنوِّلني إياها البنت المزيونا
تقرأ بلهجة أهل سنجل
