يا عمنا سام
صورة محكية ساخرة
بقلم الداعي بالخير : صالح صلاح شبانة
Shabanh2007@yahoo.com
يا عمنا سام ، يا رئيس العالم اللي من المفترض يبقى حُر ، وما تبقى عصاة سَوّ في الشر إتحُر
يا عمنا سام ، يا مُدّعي العدل وحقوق الإنسان ، وانت ما بتعرف العدل ، وبالظلم تُنقُط واتشُرّ
ولا تغتر بالكلب يظله دايما تحت رجليك ، يا ما كلب عقر صاحبه ، وصار يشحَط فيه وايجُّر
يا عمنا سام ، يا عين الشر اللي ما بتسهى ولا بتنام ، تنتشي على عذابات البشر ، وهي توجع واتحُرّ
كلبك لِمدَلل يا عمنا سام ، انيابه طِولِت ، ونال بالشر اللي اقترب منه ، واللي قدّامه بنهزم ومنه وبفَِر
معه سلاح ماضي ، انيابه مرض واسّعار، وخيمتك عليه سِتِر وستيره ، وبتحميه من كل شر
وما في شر الا شروره ، وما أفسد الأرض إلا كلبك يا عم سام ، وإيدك اللي بترفعه كل ما هوى وخَرّ
***********
يا عمنا سام ، يا ولي أمر الأرض ، يا للي فرضت ولايتك علينا بالهراوه ، والسلاح ، وصرنا نرتجف منك وانّهُر
واذا تنحنحت علينا ، ضيّعنا على حالنا وحوالينا، وتقلعطنا من الخوف وصارت مدافعنا توِّز كل ما ترمي واتّوِّر
أي نعم انت قوي ، بس ربنا أقوى منك ، ولو آمنا بقوة ربنا مثل إيماننا بقوتك ، لا صابنا ذل ولا اتقلعطنا وصابنا عِرّ
يا عمنا سام ، لو بنخاف من الله مثل خوفنا منك ، كان ما صارلنا عقود ، بنراوح محلنا ، عَ نغمة معتدل سِرّ
وكلبك يكبر وينصح ، وكلبك يعوي وينبح ، وكلبك ينهش ويعقر ، وايبُق دم العراقيب ، وما على اسنانه إشي مُرّ
كلبك يا عم سام طغى وبغى ، وخوفنا زاد ضراوه ، ودَعْمَك خلاّه أسطوره ، شريط رعب عَ العقل بِمُرّ
كلبك يا عم سام نشر الخوف والرعب، وبقوة نفسك صار يشخر وينخر ، وصار وباء عَ الأرض ، وأذى وضُرّ
***********
يا عمنا سام ، يا منبع الوجع والآلام ، يا للي ميزان عدالتك مكسور ، وما عاد بيجي منه إشي يفرح ولاّ ايسُرّ
إندَه عَ كلبك ، حَمِّر عينيك ، كشِّر عن انيابك ، راحت يا مسخمط هيبتك ، وصفيت طرطور يطرطر ، وايْطُرّ
يا عمنا سام يا للي نصّبِت حالك صنم ، وحطيت في كل بلد كلب ينبح الناس بسم العقيده اللي بتآمن فيها وبتقِر
قديش هَدي على رجلين ها لصنم قدّمِت؟؟ وقدّيش حطب من ها لبشر الآمنين حرقت وصِبت بالضر
لأنك قوي وعظيم ؟؟ ووين اللي بقوا أقوى منك وأعظم منك صاروا؟؟ لو دامت لغيرك ما إجتك ، لحالها اتجّر
يا عمنا سام ، يا موت ويا سآم ، يا صخر على صدور البشر ، يا شوكه في حلوقهم مؤذيه ، ووجودها ما بسُرّ
يا مالك زمام العداله ، عدالتك اللي بتفهمها ، العداله العرجا ، اللي بتمشي وبتوقع ، اللي بتعرج وبتغر
***********
يا عم سام يا للي صنعت من القتله والمجرمين ، اللي ايديهم ملوثه بدم المسيح ، اللي بتعتقد فيه وبتقِر
دعاة حريه وسلام ، ويا ما طبلت وزمرت لديموقراطيتهم اللي رجليها بتخوض في الدم اللي بنزف وبِخٌرّ
لولا ضلالك وانحيازك ، لولا حقدك الأسود عل شعوب الأرض ، لولا دم القراصنه اللي في عروقك بِمُرّ
ما صدّيت عن الحق ، واتبعت الباطل ، ما مغطت الدوده تتصير ثعبان ، ونفخت القزم اللي طبعه غذِر
وعملت منه أسطوره ، جايز السلاح الماضي بجرح ، وجايز بقتل ، والإيد الآثمه السلاح فيها خطِر
وانها يا عم سام ، الشمس ما بتتخبى با لغربال ، والظلم وخيم ، مصيره للموت والزوال ، مهما حقق من نصر
هي جوله للباطل قبل ما يغور ، هي جوله ، والحق يعلا ، والباطل يسقط ، والحق من أسماء الله والقدَر
تقرأ بلهجة أهل سنجل