أيسر محمد هصيص
بطاقة شهيد
صورة حية من صور الجهاد الفلسطيني
بقلم الداعي بالخير : صالح صلاح شبانة
Shabanah2007@yahoo.com
مرّات بتبدا البطوله مع الحلم ، ومرّات قبل الحلم ، فجأه بحس الطفل حاله ولاَّ وهو زلمه غصب عنه
ولاَّ وهو مسؤول عن عيله وعيال ، وينزل مثل الأسد ، في الساحه يصول ويجول ، رغم زغر سِنّه
وأيسر محمد هصيص ، ابن جنين البطوله والشموخ ، بقى على موعد مع الشهاده من غير جميله ولا مِنّة
من غير ما يقول : يا أرض اشهدي ، على دمّي اللي سال ، دمك مبارك مثل مطر الخير النازل من مزنه
يا للي دخلت الحياه بطل ، وطلعت منها بطل ، وبقى أخوك وصاحبك الأمل ، اللي هو منك وانت مِنّه
هذا الموت اللي إلو مواسم حمرا ، بتيجي كل ما الظلم عَ الأرض ، بيجي مليان أسى ، إلو طنّه ورنّه
ويا أهل اللي مضى بطل ، بعد ما حط بصمته عَ التاريخ ، ودّعوه بالمسَرّه وامسحوا عنه حزنه
*******************
أيسر ، يا رب تيسرها عليه مثل ما يسرت الشهاده لِمباركه ، يا شاب قديش دست على آمال وأحلام
وقدّيش ارتقيت بعقلك لفوق ، وتبعت نبض قلبك اللي بقى يدق للأرض ، وبسم الوطن يصحى وينام
وقدّيش مواجهه ومواجهه من الدفاع عن الحق ، خضتها مثل عنتر ، فارس عبس من أجل الوطن ما ينضام
طلة بطل طلاّتك ، يا فارس في ميدان البطوله ، صُلت وجلت ، والشهاده بقت ملازمه لقلبك غرام
اتنام وتصحى في عقلك اللي زرع حلم الشهاده ، وظلت تناغيك باليوم والساعه ، وكأنك تلقيت إلهام
من رب العزه ، اليوم زفتك يا فارس بطل للجنه ، وودعت أهلك واصحابك ، وسرت عَ الدرب بطل هُمام
ونفذت وعدك وعد الحُر ، وعد الأمل ، وعد انكتب على شعب فلسطين الحرّه ، تيحل عل قدس الأرض السلام
*******************
روت أمك انها حسّت بقلبها اللي عمره ما خاب ، إنه عمرك في الأيام قصير ، والدنيا ضاقت عليك ، وما عادت توسعك
وقدّيش طلبت منك ترحم الأسره اللي بتعيلها مع أبوك ، تيعدّي الزمن ، ويكبروا على الأمل خواتك واخوتك
بس انت حثيتها تبعد الحزن عن قلبها ، شو قيمة الوطن لعاد ، إذا بخلنا عليه بالدم ، إذا ما انزنق ؟؟
وتكالب عليه العدو ؟؟ قديش بقيت تحس بواجبك تجاه ها لوطن اللي بالظلم انتكب ، بس عاش فيك ومعك
وعينت أخوك أيمن اللي بزغرك ، وباقي أخوتك ، يسدوا محلك ، إذا ما نلت الشهاده ، وشغر مطرحك
ومشيت فارس ، وطول عمرك فارس ، من ما حسّيت بمعاناة أبوك في الحياه ، ودشرت العلم ، واخليت مقعدك
وعانيت من الجهد والعرق ، بس بقى القرش من ايدك يسند مع أبوك ظهرالعيله ، ظهر أمك واخوتك
*******************
يا رب للقدس والأقصى اهديه ، وعيني ما تقر وبالي ما يهدى ، إلا لماّ يتحرر الوطن ويوخذ لأبني بثاره
يا رب عَجِّل للوطن مين يرفع المعاناه عنه وعن أهله ، ويحرر أرضه وترابه ، ويطفي حرقة ناره
بقى أبوك ، يا شهيد جنين الصمود والشموخ ، يا غالي يخاطب نعشك ، وانت عَ النعش والجنازه سيّاره
بقيت بطل وانت محمول ، مثل ما بقيت بطل وفي إيدك حجر ، وهي تتفجر براسك الرصاصه لِمّحَرَمه الغدّاره
قديش طغوا وبغوا ، وقدّيش قاماتهم القزمه تطاولت على أمّه بقت في يوم ضاربه جذوة الحضاره
وبقت عريقه ، وقامتك مثل امتدادها شامخه ، وكل شهيد ارتقى العُلا ، ما بملك سلاح غير لِحّجاره
وحجرنا يا أيسر هصيص رح يخاطب كل محافل الدنيا ، إننا أمه ما بتموت ، وثورتنا رح تظل هَدّاره
وكل ما سقط عَ أرض الكرامه فوج ، يطلع وراه فوج ، وأفواج متلاحقه بهمه قويه ..تهدر عَ الأرض جبّاره
نام .. مثل ما قال أبوك ، قرير العين ، لرحمة الله ورضوانه ، وشعبنا الأبي ماضي في مساره
29/11/2000 م
تقرأ بلهجة أهل سنجل