384- منها واليها
الأرض ما بتشتد إلا بأهلها ، ونفس الرجال بحيي الرجال ، سعيده يا الأرض ، يا للي راس مالك رجال
سعيد يا وطن يا مرتوي بالعرق قد مية المطر ، شارب من بدن الزارع والفلاّح ، ومن هامات العمال
الأرض ما بتسعد إلا بأهلها ، وبتأن من اللي خان وغدر ، ما دام ابنها الوفي يوهبها دمّه ، وما بنسى حقه لو مهما الزمن طال
الأرض مثل الفرس مدلَلَه ، وان خدمتها جادت الك ، وقد ما أعطيتها بتعطيك ، إشي أغلى من الذهب والمال
عز وكرامه ترفع راسك لفوق ، وان حكتّها التجربه ما بتطاطي ، ولا بتخليك تذِّل وتنحني ، ويسقط عن راسك لِعقال
الأرض مش بس تراب ، الأرض حس معطر يشرِّف البشر ، منه جبلة أبوك الأول ، مضمخه أحاسيس وأحلام وآمال
الأرض منبتك و مستودعك ، ومنها اجيت والها رجعتك ، منها أخذت الحياه ، وفيها بتحفظك ، وكلنا إليها آل
