النكتة الفلاّحية ــ 40
طرائف من حياة وذاكرة القرية
جمع وإعداد : الداعي بالخير: صالح صلاح شبانة
Shabanah2007@yahoo.com
انتحار :
واحد شوفير بقى محمّل ركاب وبمشي بسرعه جنونيه ، فقام شرطي استوقفه ، وتناول المسدس اللي معه وقال له : إذا بدك تنتحر في ستين داهيه ، خذ مسدسي وروح حط طلقه في راسك ، بس إذا بدك تنتحر وتسحب لك أكم من واحد معك ، اسمح لي أقولك ، نطه وفاتتك ...!!!
السخل :
واحد بلدياتنا بقت الو نقيبيه (لقب مكروه) ، يقولوله (السخل) ، والسخل هذا سافر على البرازيل أيام عزها ، وعمل ثروه مش بطاله ، وبعد ما غاب زمن طويل ، رجع ، ولاَّ الناس بعدهم بقولوله السخل ، فراح على المختار ، وقال له : وبعدين يا مختار ؟؟ شو نعمل في السخل هذي ؟؟ قال له : ما عليك ، روح اذبحلك أكم من ذبيحه واعزم وجوه البلد ، واحنا بعدين بندبر الموضوع ، الزلمه ما قصّر ذبح وطبخ ، واجوا الناس تعشوا وانبسطوا ، وبعد ما شبعوا تنحنح المختار وقال : مثل ما بتعرفوا يا جماعة الخير ، ابننا فلان سافر وغاب وجاب ، واليوم رجع للوطن ، واحنا بقينا نقول له السخل ، وبعد ما كبر ما عاد اسم السخل يلايمه ، من هلقيت وطالع صيروا نادوه بالتيس ...!!!!
دحدول الحمدان :
بقوا زمان لمّا الواحد يبني دار ، ينقش على حجر عباره معينه ، واسمه وتاريخ البناء ، فإجا واحد اسمه دحدول الحمدان بنى دار ، وحب يكتب عباره جديده ، تبقى طنّانه وتختزنها ذاكرة الناس ، وراح يدّور على عبقري فلتة زمانه ينقش له العباره الحلم ، واهتدى على واحد مخبول شغل نهفات ، قال لحاله : رزقه وساقها الكريم ، وعلى رأي المثل : [ موت الحمير فرج للكلاب ] ...!!!
سمع الفكره من الزلمه ، وقبض اللي فيه النصيب ، وقال له غيب لك أكم من يوم وتعال ، بتلاقي المطلوب منقوش على الحجر ..!!!
المهم غاب يومين واجا ولاّ وهو كاتب له عباره جزيله ، ما فيش في اللغه العربيه أجزل منها ، كتب له : [ما شاء الله وكان] ، وفي السطر اللي تحته ، [دحدول الحمدان] ....!!!!
شقعه :
بقوا اثنين كذابين فشّارين متقاتلين مع بعض ، وهذا يصرخ على هذا ، وهذا ينخع على هذاك ، وبعدين واحدهم قال للثاني : علي الحلال إن شقعتك شقعه ، لأجيبك في المدينه المنوره ، فقال له : يا ريت تتفضل علينا بشقعه ثانيه ، بلكي الله سبحانه وتعالى كتب النا الحج على شقعاتك ...!!!!!
ذوق :
واحد مرته ماتت ، فراح يشتري لها كفن ، فبقول للبياع : شوف لك كفن رخيص حيا الله ، لأنها المرحومه ما بقى عندها ذوق ، فقال له : بالفعل ، لأنه لو بقى عندها ذوق كان ما أخذتك ...!!!
الملائكه :
واحد لمّا حس انه قاصد باب كريم والموت بحوم فوق راسه ، راح جمع أهله وقرايبه وطلب منهم يجيبوله فرقة طبّالين وزمّارين ، ولمّا سألوه عن السبب قال : سمعت إنها الدار اللي فيها طبل وزمر الملائكه ما بتدخلها،وهيذ بركي نسيوني وخلّوني في حالي ..!!
استشاره :
واحد راح على جاره وقال له : ترى أنا جاييك استشيرك استشاره ، والمستشار مؤتمن ، فقال له : تفضل ، قول !! فقال : أنا بلا زغره قررت بكره أغسل أواعيي ، يا ترى بكره الشمس بتطلع ولاَّ لأ ..؟؟؟
شطبت :
واحد فات على مطعم ، وبقى صاحب المطعم يضبضب في عدته وبده يسكر ، فسأله : يا ترى شو عندك أكل ؟؟ لأنه محسوبك هافت من الجوع ، فقال له المطعمجي : والله يا أخ لسوء حظك شطبّت ، فقال له : طيب هات لك صحن شطبّت ..!!!
صايعه :
واحد مسطل خمرّجي سوكرجي ، ظل طول الليل يسكر ، ووجه الصبح روّح مش شايف الفضا ، وبقى باب داره يختلف عن كل دور الناس ، بدل ماتفتح لجوّه بتفتح لبرّه ، ولمّا دق الباب وفتحت له المره ، ما دري هو جوّه ولاَّ بره ، فصار يسب ويزندف لمرته ، وين باقيه صايعه طول الليل ، يا كذا وكذا وكذا ...!!!
