النكتة الفلاّحية ــ 44
طرائف من حياة وذاكرة القرية
جمع وإعداد : الداعي بالخير: صالح صلاح شبانة
Shabanah2007@yahoo.com
الشفرات :
واحد سافر على بلاد برّه ، بعد شهر زمان بعث له أخوه الزغير رساله : إلحقنا برجعتك أبوك في خطر ، وبدّه يشوفك ، الولد ما اهتم في الموضوع كثير ، وبعد شهر ثاني أرسل له أخوه الكبير رساله مستعجله: الحق أبوك في خطر وبدّه يشوفك ، المرّه أخذ الموضوع جد ، وسحب حاله ورجع ، التقى أول ما التقى بأخوه الزغير ولحيته طولها فتر، ولاّ وهو بقول له : الله لا يجيبك ولا يجيب الطريق اللي جابتك ، الحق شوف أخوك الكبير ، سحب حاله وراح على أخوه الكبير ، فإذا بلحيته طولها بيجي شبر ، ولاَّ وهو بقول له : الله لا يجيبك ولا يجيب الطريق اللي جابتك ، الحق شوف أبوك ، راح على أبوه ولاَّ لحيته بيجي طولها شبرين ، ولاَّ وهو بقول له : الله لا يجيبك ولا يجيب الطريق اللي جابتك ، هو اللي بنقلع وبسافر على بلاد برّه بوخذ الماكينه والشفرات معه ؟؟
كندره كامله :
واحد تجوّز وحده ، ولمّا وصلت العروس للدار ، تفقدها ، ولاّ وهمه ملبسينها فستان ملط بلا اكمام ، وصندل ، هو شاف ها لشوفه وقبّعَت معه : أبوكم يا حَوّش يا نصابين ، أدفع حق فستان كامل ، تجيبولي اياها بنص فستان ، وأدفع حق كندره تجبيوها مقطّمه ؟؟؟
وانحرق دمهم وهمه يقنّعوه انها هذي الموضه ، وهيذ العرايس بلبسن ، بس طبل بجنب أطرش ...!! ولمّا خيرهم يوخذوا العروس ، ولاَّ يجيبوا باقي الفستان والكندره ، اضطروا يوّفوهن مشان الطبخه تمشي ..!!!
وجع الرجل :
واحد ختيار رجله أوجعته ، راح على الدكتور ، وفحصه الدكتور ، وما لقي عنده سبب معين ، فقال له : وجع رجلك من السن والشيخوخه ، وهو وجع طبيعي ، فقال له الختيار : مع احترامي إلك يا دكتور ، اللي بتقوله مش صحيح ، لأنه لو الوجع مثل ما بتقول ، كان وجّعَتني رجلي الثانيه ، ما دامهن بنفس العمر ...!!!
قاسم وبكري :
بقوا اثنين واحد أسمه قاسم وواحد أسمه بكري ماشيين مع بعض ، فشافوا كلبه واولادها ، وبقى جرو منهن بعيد عن امه واخوته ، فبكري بقول لقاسم : الظاهر هذاك الجرو قاسم عن أخوته ، فقال له بكري : ما هو هذاك البكري فيهم ...!!!
قطايف :
واحد من بلدياتنا بقى متجوز أربع نسوان ، ومخلف من كل وحده عشر أنفار ، يعني مجموعهم بالصلاه على النبي 45 نفر ، وملحه في عين اللي ما بصلي على النبي ..!!!
المهم الدنيا رمضان ونازل موسم القطايف ، الزلمه جايب حوالي 150 حبة قطايف ، حاسب حساب كل نفر 3 حبات ، لسه ما حطوهن ولاَّ شحاد على الباب ، السلام عليكم ، لله يامحسنين ، الله يطول عمرك ويزيد خصبك وتخلّف أكثر وتجيب أكثر ، فقال الزلمه : أعطوه حصتي ، مشان مرتك أم فلان ، الله يخليلك اياها هي واولادها ، قال أعطوه حصتها ، ومرتك فلان ، وولادك فلان وفلان ، أعطوه حصصهم ، وبعدين قال : لا عمرن ذقنا القطايف ، أعطوه الجمل بما حمل ، ولما مسك الصينيه قال : ما فيش كيس نحط القطايفات فيه ؟؟ فالزلمه سحب الصينيه من إيده وقال له : طلاق منهن الأربعه ما بتوخذ ولا حبّه ...!!!
المنسف :
بقى واحد من بلدياتنا متجوز ثلاث نسوان ، وبقى يعدل بقدر المستطاع ، بس بقى متهم بالمغاوزه ، كل وحده تتهم ضرايرها أنه بحبهن أكثر منها ، ومسودات حياته .. يوم قال لهن : جايين عنّا ضيوف ، بدي تعملن منسف محندق يبيض الوجه ، جايين عنّا ضيوف ، النسوان ما قصرّن ، عملن المنسف ، وروّح بدون ضيوف ، وين الضيوف يا أبو فلان ؟؟ قال : إنتن الضيوف ، هاتن هالمنسف وحطنّه على راسي ، وسمن بسم الله ...!!
النسوان حطن المنسف على راسه ، ودارن حواليه يوكلن ، لمّا شبعن ، ونزلن المنسف ، وسألهن : إن شا الله ما غاوزتش مع حدا ؟؟ قالت وحده : أنت بقيت تميّل راسك ناحية فلانه مشان اللبن يسيل ناحيته ..!!
وكل وحده أطلعت حجه ، وتبين أنه الزلمه أعوج وما بحب الأستقامه ، قال لهن : الصبح حضرن حالكن مشان نروح على المدينه مع بعض ، ودشرهن وراح طالع ، على ناس معرفه، عندهم بنيه حلوه ، طلبها لنفسه ، لأنه ناوي يستقر ويرتاح ، وبدّه يطلق نسوانه الثلاث اللي قالبات حياته ، الجماعه أعطوه ، واتفقوا يطلعوا ثاني يوم على المحكمه ويكتبوا الكتاب ..!!!
ثاني يوم راحوا على المدينه ، طلق الحريم الثلاثه ، وكتب كتابه على العروس الجديده ، وعاش أحلا وأحسن حياه ...!!!!!
