النكتة الفلاّحية ــ 46
طرائف من حياة وذاكرة القرية
جمع وإعداد : الداعي بالخير: صالح صلاح شبانة
Shabanah2007@yahoo.com
مصنع رجال :
واحد بلدياتنا سافر على بلاد بره ، والمضيف اللي نزل عنده عرّفه على واحد صناعي كبير ، أخذه يفرجه على المصانع ، السيارات والطيارات وغيرها ، وكل ما يفرجه على إشي يقول : عنّا أحسن ، فالصناعي استغرب في الأحسن ، وقال : عليّ ما عليّ لأروح أزور بلادهم واشوف اختراعاتهم .. وأول ما وصل أخذه على حمام ، وبقى واحد أسود واثنين بليفوا فيه ، فسأله : شو هذا ؟؟ قال : هذا مصنع زلام ، والمنتوج هذا انحرق في الفرن ، وهذول الثنين بجلوا فيه ...!!!
شبيه بالحيوانات :
واحد بلدياتنا مرض ، وراح على عيادة طبيب بيطري ، فالطبيب بقول له : هذي عيادة طبيب بيطري ، ليش جاي تتعالج عندي ؟؟ فقال له : أنا بشتغل قد لحمار ، وبتبهدل قد كلب ، وبنام عند مره قد البقره ، وما بدك أتعالج عند بيطري مثلك ..؟؟؟
الحرير المرمي :
واحد من ها لمخاتير بقى وجه قرايبه ، وها لناس بقصدوه مشان يحل مشاكلهم ، وبقت مرته قايمه بواجب ضيوفه ، على ما يرام ...!!!
راح الزمان ، وربنا سبحانه وتعالى كتب الموت على ختيارته واجتباها ، وصارن كناينه يكشرن ويهمّرن بوجه الضيوف ، ويجحدن وجوده ، مشان ما يقومن بالواجب ، فالزلمه حزن ، واكتئب ، وانطوى على نفسه ، وصار يتمنى الموت تيخلص من ها لذل ، على مبدأ المثل اللي بقول : الموت للإنسان بعزه ، مثل يوم عرسه ..!!
ويوم من الأيام لقي شقفة حرير مرميه ، فحزن على نفسه ، وقارنها بالحرير المهمل المرمي ، وقال بخاطبها :
ياشاش ياما حطوك عَ الراس ، غالي سقط في إيد غالي
وبعد ما عزوك هانوك ، واللي جرالك جرالي
نقوط :
ثلاثه من بلدياتنا راحوا على عرس صديق إلهم ، الأول طال 10دنانير ونقطهن للعريس ، وسحب المسدس وطخ 10 طلقات ، الثاني نقط 20 دينار وطخ 20 طلقه ، الثالث نقط 30 دينار ورمى قنبله يدويه ...!!!
شلل نصفي :
واحد بقى رايح في الطريق ومسرع ، لقيه صاحب من اصحابه ، على باب الله ؟؟ على وين العزم ؟؟ قال : حماتي أكلت رطل سمك ، وصابها شلل نصفي ، فقال له : أكيد رايح تجيب الها الإسعاف ، فقال له : ابدا ، أنا رايح اشتريلها رطل ثاني ....!!!!
الحمار المنفوخ :
واحد صديق النا من بدّو ـ رام الله اسمه أكرم ، عنده حمار مجعوم ناخر من الوهن والضعف ، عرضه للبيع ما جاب خمس دولارات ، راح عَ البنشرجي وجرح لِحمار ونفخه ، فصار حمار سلامة قدر أكرم ، هيبه ما يتخير عنه ، في الو صاحب عَ البركه من قطنّه اسمه داوود ، راح باعه لِحمار بخمسين دولار ..!!!
مقاوله :
واحد جاب ثلاثه مقاوله ، واحد يحفر والثاني يمد مواسير ، والثالث يدمل ، يوم اللي بمد المواسير غاب ، صاروا واحد يحفر ، والثاني يدمل ...!!!
