النكتة الفلاّحية ــ 49
طرائف من حياة وذاكرة القرية
جمع وإعداد : الداعي بالخير: صالح صلاح شبانة
Shabanah2007@yahoo.com
شوفير مثلك :
وحده بقى عندها ولد قليل الأدب ، ومضطرة توديه مشوار بسيارة ، فوقفت شوفير مثل صاحبي أكرم منصور ابن بدو الباسلة ، وقالت له : يا اخوي ، ابني هذا قليل أدب ، وبدي أبعثه معك للمجمع ، بلاقيك أخوه وبتسلمه اياه ، بس اذا بدك تحفظ احترامك لا تحكي معه ولا كلمه شو ما قال يقول ..!!
الولد قعد في الكرسي الوراني وصار يحكي مع حاله ويقول : لو أبوي عصفور وامي عصفوره كان جابوا عصفور زغير ، لو أبوي غزال وأمي غزاله ، كان جابوا غزال زغير ، لو أبوي حمام وأمي حمامه كان جابوا زغلول زغير ...!!!
الشوفير فقعت معه وفرط عنده صندوق الصبر ، وسأل الولد : لو أبوك وسخ وأمك وسخه ، كان شو جابوا ؟؟ فقال له : كان جابوا شوفير مثلك ...!!
فلسفة البخيل :
واحد بخيل بقى ينازع وناوي على باب الكريم فصار ينادي على أولاده واحد ورا الثاني: أحمد أنت هون يا حبيبى؟ فقال له أحمد : أيوه يابا أنا هون . عيشه يابا أنتي هون يابا ؟؟ قالت عيشه : أيوه يابا أنا هون ، ورد قال : محمود يابا :أنت وين؟ فقال محمود نعم يابا أنا هون عندك هون الأبو دخنت معه وراح راقع هاصوت من قحف راسه : هو أنتو هون يا كلاب حوَلّيَ ومدشرين ضو البرنده مضوي ؟؟؟ ولكم هذا اشي بطير الموت من الراس !! هذا وانا بنازع عملتوا هيذ ، يا ترى شو رح تعملوا بعد ما أموت ؟؟
مين عَ الباب :
فلاح أخذ شهادة دكتوراه فقال لمرته : والله أنا مش عارف ليش الناس بضحكوا على الفلاحين مع اني جبت الدكتوراه من خنّاقها فقالت له مرته : صلي على النبي ودق عَ الخشب لحدا يطسك عين تخزقك ، فقام دق على أقرب خشبه عنده ، فانتبهت مرته وقالت : خليني أشوف مين بدق عَ الباب ، فقال لها اقعدي انتِ وخليني أشوف انا ...!!!
جسر بحري :
مرة فلاح طلعله عفريت علاء الدين وقال له شبيك لبيك خدامك بين ايديك ، أطلب واتمنى ، قال له : بدي جسر يقطع بحر الظلمات من أوله لأخره اللي يسافر الواحد على أمريكا بالسيارة ، فقال له مستحيل ، هذا صعب ، ما في أسهل من هيذ ؟؟ فقال له : آه ، في ، بدي تخلي أهل هذيك البلد يبطلوا يحلفوا بالطلاق ، فقال له : بعد ما أخذ صفنه وسرح في خياله : وبدك الجسر باتجاه ولاَّ باتجاهيين ؟؟
قدها وقدود :
من خراريف طابون ستي قالت :
في زرافة و فيل وأسد وفأر وثعلب وارنب بقوا ماشيين في الغابة ، قاموا وقعوا كلهم في جوره إلا الزرافة ، وهون قالولها : جيبي لنا حبل، قالتلهم : ومنين يا حسرة ؟؟ما فيش قالولها : طيب إحنا جعانين وبدنا نوكل .قالتلهم : ومنين أجيب لكم أكل ؟؟ قالولها : والعمل ما هو لازم تتصرفي ..!!!
قالت لهم: أحسن حل عندي انكم توكلوا أضعف واحد فيكم ، قام الفأر نط مخروع ، وقال لهم : اللي بقرب من الأسد بدمره تدمير !!!
الفرافير الملونه :
شوفير بقى ماشى على الطريق ، قام واحد لابس احمر فى احمر أشرّ له ، فوقف الشوفير و قال له : انت مين و وشو بدك ؟؟ قال له : انا الفرفور الاحمر و بدي توصلنى ، فقال له : لا أنا ما مبوصلش فرافير ومشى شوية قام لقي واحد لابس اصفر فى اصفر وبأشر له ، فوقف و قال له : انت مين و شو بدك ؟؟ قال له : انا الفرفور الاصفر و بدي اياك توصلنى فقال له :يبعث الله أنا ما بركبش فرافير ، دشره و مشى شوية ولاَّ ملاقيه واحد لابس اخضر فى اخضر ، فرفور أخضر نفس القضيه ، دشره الشوفير الفنجري و مشى ، شو ية لقي واحد لابس كحلي فى كحلي ، أشر له ،الشوفير وقف و قال له : يا ترى انت الفرفور الكحلي ؟؟ فقال له الفرفور الكحلي : فرفور ايش يا أهبل يا ابن الهبله ؟؟؟ رخصك يا روح امك ، وراح طاسه مخالفه من العيار الثقيل ...!!!!!!
حرامية آخر زمن :
اثنين على باب الله ، حبوا يسرقوا عماره فقالوا لبعض احنا نوخد العمارة بعيد ونسرقها براحتنا ، فشلحوا أواعيهم وقعدوا يزقوا فى العمارة يزقوا ، إجا واحد ابن حلال من وراهم وسرق أواعيهم ، فواحد منهم اتطلع ورا ما لقيش الأواعي ، فقال لهم لهون وبس يا جماعة الخير ، احنا بعدنا كثير ...!!!!
نملة الباليه :
مرة واحد بقى يتمنى يعمل شغله تتذكره الناس فيها ، ففكر انه يعلم نملة ترقص الباليه ، وفعلا جاب النملة ونجح فى تعليمها.... وقال يا ترى مين يقدر هالفن العظيم ؟؟؟
وقرر انه يعرضها على الاطفال ، فقابل ولد وسأله شو اسمك عمو ؟ قال اسمي محمد ، فسأله : شو هذي يا عمو ؟؟فقال له الولد :هذي نملة ، وفعصها باصبعه ...!!!!
الزلمه انجن وقعد فى المستشفى سنين كتيره... وهو مش مستوعب الصدمه ...!!!
المهم علم نملة ثانية الباليه.... !!!!
وقال هذي المره بدي أعرضها على الشباب ، بلكي بيفهموا أكثر من المساخيط الزغار ،
فراح لشب و سأله شو اسمك يا عم ؟؟ قال : محمد
فقال له الزلمه العبقري :شو هذي يا عم ؟؟ فقال له الشب: ماني قلتلك من عشرين سنة انها هذي ، نملة وبرضه راح فاعصها باصبعه ...!!!!
http://www4.0zz0.com/2010/03/27/12/668939012.jpg
الداعي بالخير
صالح صلاح شبانة
http://turath.mo5ayam.com/vb/index.php
منتديات سنجل الباسلة
الموقع الشخصي للكاتب والباحث صالح صلاح شبانة
هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .