النكتة الفلاّحية ــ 51
طرائف من حياة وذاكرة القرية
جمع وإعداد : الداعي بالخير: صالح صلاح شبانة
Shabanah2007@yahoo.com
قفشات :
• بقره وقفت قدام لِمّرآه ، لمّا اندهشت بجمالها قالت : مش حرام كل ها لجمال وجوزي يبقى ثور ..؟؟!!
• واحد زنخ ثقيل دم ، زار مريض وطوّل عنده ، فقال المريض : إحنا تضررنا من كثر الزوار الداخلين علينا ، فقال له الزنخ : أقوم أسكرلك الباب ؟؟ فقال له : يا ريت ، بس من بره ، وانت طالع ..!!!
• اثنين مسقعين لقيوا واحد وحبوا يتخوثوا عليه ، فسألوه : انت حمار ولاَّ ثور ؟؟ فقال : حسب علمي لا هذا ولا هذاك ، بس أنا بينهم الأثنين ..!!!
• واحد راح يشتري أغراض ، فقال له البياع : ترى كل ما اشتريت أكثر قل عليك السعر ، فقال له : على هالخبرية خليني أروح أجيب شاحنة وأظل أعبي لما يصير السعر ببلاش ..!!!
• التقوا اثنين كذابين ، فواحد بقول للثاني : بتصدق اني بعرف ربع سكان الأرض ، فقال له الثاني اللي بقى أكذب منه : الله يسامحك على هالخبريه ، لو قلت لي من زمان كان عرفتك على الثلاثترباع الباقيين ...!!!
• حقائق مثبته علميا ... اسرع ثلاث كائنات بشرية :الفهد ...النعامة ... و بنت لاحقها صرصور ...!!!!
• على رأي واحد من التيوس : العلم نور و النور كهرباء والكهرباء خطر اذن العلم مثل قلته ، وميت اخص ولا رحمة الله عليه شمطته الكهربا ...!!!
• اثنين كانوا بقوا يلعبوا بالشده بناقل ، وبقوا بلا مرارات ، ومن قد ما طولت اللعبة معهم ماتوا الشايب والولد والبنت والجويزات بالجلطة ...!!!!
• واحد شاف وحده لابسه كندره بيضا ، فقال لها : يجعل يومي مثل صرمايتك !!!
• واحد فلاح اول مرة يشوف فلبيني ، فقال يا هنياله هذا شبعان نوم ..!!!!
• معلم ومعلمة رياضيات اتجوزا ة خلفوا ولد متساوى الساقين ، والأضلاع والزوايا منهن وغاد ...!!!!
• واحد موشش بيقول لصاحبه مش عارف يا أخي عود الكبريت هذا ليش مش راضي يولع ، مع إني لسه مولعه قبل شوية ، وولع ...!!!
• واحد بسأل اصحابه : شو الفرق بين الاسبوع وشفرة الحلاقة والصحراء؟؟؟؟؟ فلما عجزوا عن الجواب قال لهم : الاسبوع فيه حد ، والشفره فيها حدين ، والصحراء ما الها حد ...!!!
• أوفى مخلوقه في الدنيا : نملة مات جوزها الفيل وقعدت طول حياتها تدفن فيه ، وما خلصت ...!!!
• مره 10 مطششين بيلعبوا على الشارع العام ، على شرط اللي بتخبطه سيارة مرتين يطلع بره اللعبة ...!!!!
• واحد بقى تايه وبسأل واحد مسقع : شو أقرب واسرع طريق اروح فيه عَ المستشفى ؟؟ فقال له : غمض عينك واقطع الشارع ...!!!
• واحد مطشش ماشي في الشارع لقي واحد ، فقال له : كيفك يا علي ، شكلك متغير كثير ، فقال له الثاني :انت غطان بالنمره ، انا مش علي ، فرد الاول قال له : غريبة ، وغيرت اسمك فوق شكلك ؟؟
• مسقع بسأل واحد أسقع منه : تتوقع الجمعة يوافق آخر الشهر ؟ رد عليه : لو ضغطنا عليه يمكن يوافق
• واحد نذل فتح مصنع بيبسي كتب على كل علبة : رج جيدا قبل الفتح ...!!!
• بلدياتنا فتح محل انابيب غاز .. فجّر اسطوانتين فى وسط البلد .. دعاية ..!!!
• واحدة راحت تخطب لابنها .. ام العروسة بتسألها ... وياترى ابنك بيدخن ؟؟؟ ردت عليها : لا لا لا الحمد لله ، ابنى ما بيدخنش..... الا اذا سكر....!!!!
• ثعبان نظره ضعيف يوم ما حب واحده..... طلعت بربيش ...!!!
• واحد من بلدينا بقى ماسك قنبله ووقاعد بتلقفها من الإيد هذي للايد هذيك ، فشافه واحد صاحبه وقال له :يخرب بيتك اللي خلفوك ، ولك هلقيت بتنفجر فيك ، فقال له : ماتخافش معي وحده ثانيه ...!!!!
• واحد قال لأبنه: نابليون وهو قدك بقى الأول على طلاب صفه ،... فرد الولد على أبوه وقال : ونابليون وهو قدك بقى إمبراطور ...!!!!
• واحد بلدياتنا وقع عَ الدرج فظهره وجعه .. راح للدكتور.. فكتب له مرهم وقال له إدهن مكان الاصابة.. فراح دهن الدرج ...!!!!
• مرة واحد بلدياتنا اشتري تاكسي وماشي فيه ومبسوط على الآخر ، فواحد وقفه وسأله : تاكسي يامعلم ؟؟ قال له ايوه تاكسي وكمل ماشي ...!!!
• تلاتة مطششين راكبين قطار واحد اطلع راسه من الشباك اجا قطار فى الاتجاه المعاكس طيره ، الثانى اطلع ايده اجا قطار وطيرها ، صار يصرخ و يجعر ، الثالث قال له : صاحبنا طار راسه ماسمعناش صوته وانت اللي ايدك انقطعت فضحتنا ؟؟
• واحد بلدياتنا عداه العيب أخذ اللي وراه ...!!!
• مرة أتنين صحاب راحوا للحلاق واحد حلق والثاني اسواره ...!!!!
• واحد اقرع ، خلف ولد سماه شعراوي ....!!!!
• مرة اثنين من بلدياتنا حبوا يسرقوا بنك ، راحو سرقوا بنك دم ...!!!
• مرة واحد بلدياتنا وقع فى جورة نزلوا له حبل طلع مخنوق...!!!!
• واحد احول امه ماتت دفن ابوه ....!!!!
• مره بقى بس بيجري وراء بسه ، قعد يجري وراها لحد ما دهستها سيارة ، قام قال لها : احسن لك خلي الشرف يبقى ينفعك ....!!!!
• مرة واحد بلدياتنا انضرب حجر في صدره قام بحَرّ وراه ...!!!!
• مره واحد احول بيعاكس واحده حوله بيقول لها : والله انتن الثنتين احلى من بعضكن ، انتن التنتين زى القمر .. فعصبت وقالت له : انقلع انت واياه يا أسفل من بعضكم !!
• واحد بلديتنا دخل على واحد صاحبه فلقيه بيلعب شده مع الحمار ...!! فـقال له : ولك يا تافه ، بتلعب شدّه مع الحمار..؟؟؟ قاله الحمار الى مش عاجبك غالبنى عشرين مره ..!!
• مره واحد ابنه بلع محايه فاتصل بالدكتور و قال له : أبنى بلع محايه ، فقاله الدكتور اقلبه لحد ماأجى ، و بعد شويه الزلمه اتصل بالدكتور و قال له : خلص ما تجيش لأني لقيت محايه ثانيه ...!!!!
• مرة واحد راح للدكتور قال له يا دكتور لما احط ايدى على عينى ما بشوفش اشي فقام الدكتور عمل له عملية خزق له ايده ...!!!!
• واحد بخيل ابوه مات فراح يعمل نعي فى الجريده ، فسألهم : أقل اعلان عندكم قديش ؟؟ قالوا له : سطر واحد خمس كلمات ، قال لهم : اكتبوا رزق ينعى والده ، فقالوا له: لسه ، ظايل لك كلمتين ، فقال لهم : وبصلح صرامي ...!!!!
• واحد بواب عماره ، كل يوم ينزل ينادى على مرته ويقول لها : بدك اشي قبل ما أروح على الشغل ؟؟ فبتقول له : لأ ، سلامتك يا جملي ، كون يقعد على الكرسي !!!
• بلدياتنا زعلوا من النكت اللى بتتقال عليهم فكتبوا النكت كلها ورموها فى البحر فثانى يوم لقوا السمك كله ميت من الضحك ...!!!!
واحد بلدياتنا دخل محل أدوات كهربية فسأل صاحب المحل قالوا : عندك تلفزيونات ملونه قالوا : آه في ، فقال له : طيب هات لك واحد أحـمر ...!!!!!
https://turathmo5ayam.yoo7.com/منتديات سنجل الباسلة
الموقع الشخصي للكاتب والباحث صالح صلاح شبانة
هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .
