يا راعيين الغنم

يا راعيين الغنم
صورة شعبية تراثية محكية
نظم الداعي بالخير: صالح صلاح شبانة
Shabanah2007@yahoo.com
يا راعيين الغنم ، وين الغنم صار؟ صار الغنم في المرعى ، والراغي شد الأوتار ، ولأرض بلادي الحلوه غنّى
يا أرض بلادي يا حُرّه ، العيشه شو صعبه ومُرّه ، ولولا حبي للدار والديره ، ما عِشت العمر كرمالك أتعَنّى
جرحي في القلب وَجَّعْ ، ودمعي في مجمع العين اتجَمَّع ، لولا غلاوة المدمع ، ما خليته في المدمع يستنّى
شدّت لي جفرا عَ الجرح منديل ، وغنّت لي عن الوطن مواويل ، يا محلا يا عيني يا ليلي ، من جفرا تتغَنّى
يا راعيين الغنم وين الغنم سارح ، في الخلا ولاَّ في لحظ جفرا الذابح ، يا ريته اللي أخذ جفرا يسعد ويتهَنّى
جفرا يا جرح أخضر ، في مراعي القلب تتبختر ، إن أرخت جفرا عَ الظهر جدايلها ، عشق القلب واتمَنّى
جدايلها حِنشان وحيايا ، واللي بعشقها تصيبه المنايا ، ويمضّي العمر تايه ، يغني لجفرا شروقي وامعَنّى
*******************
يا راعيين الغنم فوق السفوح ، شوفة جفرا ترد الروح ، شوفة جفرا اتداوي لِجروح ، شوفة جفرا ترد الأنّه
أنّة قلبي لِمعَطّر ، بالبابونج والزعتر ، ومواسم العمر الهنيه ، البيض المسلوق لِملوّن و لِمخَمَّر ، إلها رموز ومعنى
جفرا منّا وفينا ،عاشت معنا وحوالينا ، بكل المواسم الفرحانه والحزينه، بنار الفرقه الشاعوطه وبنعيم الجنّه
غنّى طير الورور غناني ، يا خالي القلب يا امَرّمِر زماني ، ألحانه الجذلى ، عزفها الراعي في الخلا على سِنّهْ
وشبَّب يا مشَبِّب واضبط ألحانك ، ويا راعي الغنم يا سلطان زمانك ، بوجهك الخير ، وبسحر الطبيعه تتهنّى
ورد وحنّون وعبق الريحانِ ، وقرن الغزال يعانق قحوانِ ، وسنين الغربه ثقيله ، كابوس بيقتل ، الله يخرب مَطنَّه
خلاّ حياة الناس بلا طعم وبلا ريحه ،وجفرا اتدّاوي لِقلوب الذبيحه،ولولا العزاره ولولا الفضيحه ، لعملت طنه ورنه
*******************
ضبطت قلبي ضبط الأصابع ، عَ خزوق الشبّابه أتابع ، قلبي لِملّوع بالمواجع ، عَ ألحان الراعي الغنيه بالمحبه وبالمَعْنى
الراعي والحَرّاث وجفرا، والحصّادين في الشوبه والحَرّه،والشنّار الدارج في المارس،عَ رقبته طوق ، ومنقاره امحنّى
والقيظ النازل يصب اجمار، ونزلت مقاثي الفقوس ولِخيار ، والبطيخ بدمه لِحمر ، مطفي الشوبه ، ومجدد عزمنا
الأرض يا أرض أبونا وجدّنا ، وياما أخذت من عزيمتنا وجِدّنا ، وبالعرق جبلنا وبالدم ترابها ، لعرسانها تنِتّحَنّى
وحنينا إيدينا ورجلينا ، بطين الأرض ، وللعرسان غنينا ، كل موسم بطلع من الأرض عريس ، وكثِرْ عددنا وزِدنا
وصرنا عشيره حلفت يمين ، بالله والكتاب المبين ، نحيا ونموت عَ ها لأرض ، وترابه الطهور اللي جمّعنا هو عهدنا
وجفرا تغني للأرض الحُرّه ، وتِطلِع من ترابها المَسَرّه ، أي نعم إحنا بشر وبنحب الناس ، بس يا ويلك يا اللي بتدوس طرفنا
*******************
وراسك يا جفرا عالي ، يتحمم في الغيمه ومثل الشمس يلالي ، وأرضك مليانه حنّون ، وكل ما سبحت بسماكِ مُزنّه
مشّبَعَه بقطر المطر ، تهادت وتمادت ، وسبحت في السما الزرقا ، ولمّا أشتت فار من الأرض خير وما اتّوَنّى
يا راعيين الغنم ، شو أكلت الغنم اليوم ؟؟ أكلت من خير الأرض ، وبحليبها عبق العِشِب دوا ، نناله من ألحليب والجبنه
يا راعيين الغنم ، يا ريتني واحد منكم ، أسرح واقَيِّل مثلكم ، واذوق نشوة الخلا ، واسَلِّم عَ النسمات كل ما مَرَّت عنّا
مع الغنم صمت وتأمل وتفكير ، مع الغنم ألحان جذلى مليانه رقه وحنين ، وبدن سليم من الألم والوجع ، وقلب كبير ما مِنّه
يا راعيين الغنم ، يا شغّالين بمهنة الأنبياء ، تحكي الأرض للسماء ، تبعث حديثها مع النسايم ، سبحان اللي اللي خلق وأبدع الأشياء أ لمّا خلق إتأنّى
تقرأ بلهجة أهل سنجل