مواويل -10
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
كل ما لعلع رصاص في سما العروبه اتباشرنا بالخير ، وتحوَّشت أمجاد الماضي لقلوبنا ونحضت ركوه من البير
البير اللي أمجاده نامت تحت وصلة هزايم كبار، ويظل الحلم أمل ، ما دمنا تحت خيمه زرقا فوقها رب كبير
**********************
اللي سرق من عينك دمعه لمّا حرك مخازن الدموع ، رح يدفع حقها من قلبه لمّا نستله من جوّه الضلوع
مش كل لحم هني مري ولا كل لحم طير بتاكل ، لحمنا عصي عَ الهضم وسم يتجرَّعه الغاصب جروع
**********************
صار لحصان للحمار بعد ما صار النسب وضّاح ، وصار ابن العم اللي للكبش السمين ذبّاح
التناسب والتصاهر يعمي لِعيون ويجلي لِغباش ، منخل داكن ما بشوف من ورآه الدرب ولا الساح
**********************
مين شاف السمرا أم جعود السود ، يا الله على جمال السمرا قديش محسود ،
خفة دم السمرا نكهتها قهوه بهيل ، يشربها العاشق وهو يتمايل وينود
**********************
إجا لِجّرب يطلب منا قطران ، إيحك جلد منمنم من الأكلان ،
دوَّرنا في المخزن وقاع الدار ،لقينا الجره مكسوره وخالص القطران
**********************
راح الجحش يغني في المهرجان ،لأنه مدعوم قالوله صوتك كروان ،
ولمّا لِمّغني اللي مش مدعوم سمع ها لكلام ، قال بحزن : احتسبتك يا فن عند الديان
**********************
الحقيقه المُرَّه يجرعها الحر سم قتّال ، يجرجر في بطنه سكين يقطِّع الأوصال
والخداع قد ما طعمه حلو تحت السنان ، برمي في مهالك بتحرق الأبدان والأموال
**********************
صوت مثل الرعد يقصف ومطر ما فيش ، ووعود أكثر من وعود لِقديش بالحشيش ،
شهنق لِقديش وفتح للوجبه بطنه ، وراح العمر وهو يسمع عيش يا قديش
**********************
ربّي كلب جايز الكلب ينفع في ها لزمان ، وكلب يعوي معك ولا كلب إيهَمِّر عليك زعلان
تعلمنا من الزمن دروس وأخذتها الريح بعيد ، وما ظل غير نمد الرقبه عتبه للركبان
**********************
القانون الدولي للعزف ترقص عَ ألحانه القيان ، وصارت الشرعيه محرقه بعد ما فك عن حاله الزحمان
وصار الفقير والضعيف ملطشه ينداسوا بالأقدام ، ولسه الحاوي بدَوّر عَ إبره إسمها حقوق الإنسان
**********************
يا صارخ وفر صوتك الكل أطرش وما حدا سمعان ، صوتك ما صحّى النايم ، لا بل صوتك نيَّم اليقظان
صوتك خمّه يا عديم الهمّه منكر بين الأصوات، موفّر للمصايب كل مَ انهدت عَ الأمه سقوف وحيطان
**********************
قالوا حسن بطح السبع وجابه مجرور برسن ، قلت الله يسلم ايدين هذاك الحسن
طلع حسن ممروغ وحاله حال الويل ، إذا فلتت من السبع لا تحلم بصيده يا حسن
**********************
لو كل الدنيا تتبدل أنا عصي عَ التبديل ما بتبدل ، جوه دمي جينيّات بترفض تتفاعل وبترفض تتحوّل
جوّه فكري حضاره شروشها بتفتت الصخر العصي ، بتفتت الصوّان وصخر المز وشروش جوّه بتتسلل
**********************
المنجل والسيف نصل ومقبض هذا عن هذا ما بتخلى ، المنجل يحصد قمح آمان من الجوع لمّا الخوابي تتملاّ
السيف اللي بحمي الأرض والعرض والحصاد ، لولا السيف ما تجاسر فلاّح يرمي في الأرض غَلّه
**********************
راعي البقر اللي فصّل حضاره مسخ للأمم ،حضاره تنقف وجع وتنزف دم وتعصر ألم
حضاره ملعونه بكل ملّه وكتاب نَزَل ، على نبي كريم وبكل حضاره مدّونه بقلم
**********************
من جوّه الجرح النازف تطلع وردة الحَنّون ، هيذ الله خلق الجمال وخلاّه مع الألم مقرون
من جوّه القلب بتنحض أحزان والآم وآهات ، ولولا الحزن ما بقى للفرح طعم تحت السنون
**********************
ما خربت الدنيا ولا تراجعت الحضاره ونزلت للقاع ، إلا لمّا رعيان البقر أحفاد القراصنه والرعاع
صاروا أسياد على هامة الدنيا بالوسخ مغموسين ، ريحة النتن بتفوح من أفعالهم اللي طالت الأصقاع
**********************
يا زعيم ثورة الفقرا والجياع يا متخوم بالمال ، الذهب يزين صرمايتك وطعامك المكبوب تلال
يا زعيم مين اللي زَعَّمَك على ها لمسحوقين ، تحكي بإسمهم وبطنك ما حس الجوع ولا أنة ألم قال
**********************
يا اللي سحبتوا سكاكين الغدر لمّا جمل العروبه وِقِع ، لا تفرحوا كثير .. للجمل إبن بالقوه ممتنع
بكره بكبر الفيصل وبصير بكر .. وبوخذ بثار أبوه ، وياما رح تعيطوا عَ ها لخيانه دمع
**********************
اللي جاب فرخ الحيّه وحطه على مصطبة داره ، بكره الفرخ بنسى المعروف وبشن عََ اللي جابه الغاره
البطل عَ عدوه اللدود بحترمه وبحطه عَ راسه ، والخاين الوِسِخ بقرصه الفرخ اللي عارف كل أسراره
**********************
شو نقول إذا الغابات صارت أكثر من المدن ، وإذا النوم بين الضباع أأمن من الحصن؟
الحصن قيم وأخلاق بقت تحمي حياة الناس ، بس لمّا صارت الأخلاق في خبر كان راح الأمن
**********************
الغصن اللي بقى يظلل عليّ من الشجره إنكسر ، وصرت عاري تسمط فيّ الشمس وحاف فيّ الخطر
يا حسرة اللي مقتله في ايد اللي حَبّهُم وأمّن طرفهم ، يرميهم بالورد والندى والهوا الطري ويرموه بمس سَقَر
**********************
تقرأ بلهجة أهل سنجل
