مواويل -11
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
ماخربت الدنيا ولا تراجعت الحضاره ونزلت للقاع ، إلا لمّا رعيان البقر أحفاد القراصنه والرعاع
صاروا أسياد على هامة الدنيا بالوسخ مغموسين ، ريحة النتن بتفوح من أفعالهم اللي طالت الأصقاع
**********************
لِحمار موطي والحَمّار ينط ممتطي الحلس المصيون ، آمَن لِحمار إنه انخلق لينركب ليش يبقى محزون؟؟
بس لمّا أمم حره أبيه تنركب يلهب قفاها الكرباج ، شو قيمة الحريه ووين ها لحريه يا ترى بتكون ؟؟
**********************
قصيد الشعِر مبلول مثل الكرباج عَ الجلد يسمط ، وبقى لسان الحر زمان أزود من القيد يربط
ولمّا تغيرت وتبدلت غزلانها الشارده بقرود ، عليها السلام ..راحت والشعر ما عاد فيها يزبط
**********************
الذيب طمس عَ الغنم ونط من فوق الصيره ، والراعي طافش عَ وجهه والجلا بَرّات الديره
يا ريت الراعي الخاين توكله ذياب الفلا ، قبل ما توكل الذياب من غنمنا الشياه الخيره
**********************
لمّا لِحصيني فكر يقحم خم ستي ويخطف جاجه ، لِقي الفخ والجفت وسيدي والصخب واللجاجه ،
فر لِحصيني من الخوف يتدعثر بحجار الصوان، طول عمر اللي بحرس ماله لحاله ما راحت له حاجه
**********************
أمريكا بحكم القوه أم الدنيا وأسيادها عُتاه ، همهم يشربوا الدم والنفط ويدوسوا الأباه ،
قديش حُر راح فرم تحت جنازير حقدهم ، ملعون أبوهم اللي بزعموا الحريه وهمه طغاه !!
**********************
هدّوا دار شِدنا دار ..قتلوا ولد جبنا ولد ، وبعدين؟؟..قاعدين عَ قلوبهم دمامل للأبد..!!
كيف صاحب الحق ايخلي الأرض والدار ؟؟ لا تفرحوا يا خايبين ... شعبنا سيد من صَمَد
**********************
فلان محارب فلان .. وفلان من فلان زعلان ، شو ها لأمه اللي الحرابه إلها سِمَه وعنوان؟؟
قولوا يا باسط وخلوا للهمه والكرامه مطرح، ولا تبيعوا أسهم الشرف في سوق خسران..!!
**********************
الكلب الخايف بتحالى باب داره ، وكلب الشيخ مثل الشيخ بمقداره
والإنسان المُهمَل لِمصدي مثلي ، ما حدا معَبّرَه ولا مكيل بمعياره
**********************
محبوس جوّه قمقم من رصاص ، ومخَوّن حتى لو كلّي إخلاص
بياع الشعارات يقص ويفصِّل ، واحنا بنلبس وبقبض البَلاّص
**********************
كل الباساتنا مفصله من خرايط الطحين ، اللي بجودوا فيها علينا الأمريكيين
مقفانا مختوم بالختم الأمريكي الجبّار ، وبوخذوا في اليسار اللي بنوخذه باليمين
**********************
الدهر ما برحم الباز لو صار ممعوط الريش ، ولا برحم لِحصان لو صار قديش
الدهر بحاكم القوي اللي اتجَبَّر عَ الأرض ، لمّا انحط وباع الأمجاد وساح مع الدراويش
**********************
تقرأ بلهجة أهل سنجل
