مواويل -16
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
قالوا حسن بطح السبع وجابه مرسون برسن ، قلت : الله ايسلمه ، وينه هذاك الحسن؟؟
طلع حسن ممروغ وحالته حالة الويل ، إذ فلتت من السبع لا تحلم بصيده يا حسن
**********************
لو تتبدل كل الدنيا أنا عَصي عَ التبديل ما بتبدل ، جوّه دمي جينيات بترفض تتفاعل وبترفض تتحول
جوّه فكري حضاره شروشها بتفتت الصخر العصي ، بتفتت الصوّان وصخر المز وشروش جوّه بتتسلل
**********************
المنجل والسيف نصل ومقبض هذا عن هذا ما بتخلّى ، المنجل بحصد قمح آمان لمّا الخوابي تتملا
والسيف اللي بحمي الأرض والزرع والحصاد ، لولا السيف ما تجاسر فلاح يرمي في الأرض غلّه
**********************
راعي البقر اللي فصّل حضارة مسخ للأمم ،حضاره تنقف وجع وتنزف دم وتعصر ألم
حضاره ملعونه بكل مله وكتاب نزل ،على نبي كريم ،وبكل حضاره مدّونه بقلم
**********************
من وجوه الجرح النازق تطلع وردة الحنّون ،هيك الله خلق الجمال وخلاه مع الألم مقرون
من وجوه القلب بتنخض أحزان وآلام وآهات ،ولولا الحزن ما بقى للفرح طعم تحت السنون
**********************
ما خربت الدنيا ولا تراجعت الحضاره ونزلت للقاع ،ألا لما رعيان البقر أحفاد القراصنه والرعاع
صاروا أسياد على هامة الدنيا بالوسخ مغموسين ،ريحة النتن بتفوح من أفعالهم اللي طالت الأصقاع
**********************
يا زعيم ثورة القفرا والجياع يا متخوم بالمال ،الذهب يزين صرمايتك وطعامك المكبوب تلال
يا زعيم مين اللي زعّمك على هالمسخمين ؟تحكي بإسمههم وبطنك ما حس الجوع ولا أنه ألم قال
**********************
يا للي سحبتوا سكاكين الغدر لما جمل العروبه وقع ،لا تفرحوا كثير ..للجمل إبن بالقوه ممتنع
بكره يكبر القاعود وبوخذ بثار أبوه ،وياما رح تعيطوا على هالخيانه دمع
**********************
اللي جاب فرخ الحيه وحطه على مصطبة داره،بكره الفرخ ينسى هالمعروف وبشن على جاية الغاره
البطل على عدوه الودود بحترمه وبحطه على راسه ،والخاين الوسخ بقرصه الفرخ اللي عارف أسراره
**********************
شو تقول إذا الغابات صارت أكثر من المدن ؟وإذا النوم بين الضباع الذياب أأمن من الحصن ؟
الحصن أخلاق وقيم بقت تحمي حياة وأمن الناس ،بس لما صارت الأخلاق في خبر كان راح الأمن
**********************
الغصن اللي بقى يظلل عليّ من الشجره انكسر ،وصرت عاري تسمط فيّ الشمس وحاف في الخطر
يا حسرة اللي مقتله في ايد اللي أمنّ طرفهم ،يرميهم بالورد والهوى الطري ويرموه بوصب من سقر
**********************
تقرأ بلهجة أهل سنجل
