مواويل -17
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
اللي عيبه من ثمه بكره الشوارب بتلمه وبروح العيب ، -واللي عيبه بخلقه بكبر العيب معه وما بمسحه الشيب
تاج الشيب الوقار وتاج العيب العار وشتان ما بين ، اللي صان نفسه عن الخنا واللي جاب الها الريب
**********************
جايز القدم تزل وجايز اللسان يكذب كذبه ، بس عمر القلب ما كذب وطول عمر الإنسان دليله قلبه
القلب اللي تعود عَ الحب عمره ما بعرف الكذب ، واللسان الأهوج الثرثار عايش بتيه وغربه
**********************
حِت الصدا عن مفاصل بابك لِمسَكر بوجه الخير ، وافتح بابك للشمس وحيي الضيفان والغير
ولا تسكر بابك ولا قلبك ولا سمعك قدام طارق ، ولا تزّغِر كتافك لمّا ينخاك فلان وعلان وعمير
**********************
عمر الشوك ما أطلع عنب يا زارع الشوك اتذكر ، عمر الشوك ما اطلع عنب للشوك البور وللعنب الكرم الأكبر
كيف بدك يا زارع الشوك تجني العنب من البور ؟ والعنب بده سواعد مفتوله وقلوب طلحها أخضر
**********************
عُمر الشوك ما أنبت قطف ولا شوكه أثمر ، واللي برمي بدروب الناس شوك الشوك تحت خطواته بتكسر
كيف بدك تجني العنب وانت اللي زرعت الشوك ، اتلّقى عن راسك هذا حصاد عمرك اللي في حقلتك يكبر
**********************
كل اللئات اللي اتلئات في مؤتمرات القمم العربيه ، استبدلناها إبآه وأيوه ونعم وعَ العين موليتين وموليه
وكل ما خطولنا خط وأمرونا نمشي عليه مشينا ، وبعد أكم من خطوه يسحبوا السجاده و يرمونا إبليّه
**********************
أبوك لِحصان يا مهرة مات قهر وامك تجوزت حمار ، وصارت أختك من أمك قرّه ونسب العيله انهار
الأم أرض تنبت اللي برمي فيها بذر ، لو انرمى فيها شريف طِلِع شريف وما لِحِق بالنسب العار
**********************
البحر ما بتعكر من سيل ولو دب السيل في صخور ، والفيل ما بهتز ولو بات على ظهره صرصور
والوطن لو داس أرضه الإحتلال قد ما داس ، رح يظل بمشاعل الحريه يضوي وينشر النور
**********************
شط البحر مهما ضربته الأمواج تتكسر وبتتمزع، شط البحر ما بتأوه ولا بتألم ولا بصرخ ولا بتوجع
ولو عكا بتخاف من هدير البحر كان من زمان ، حملت حالها ورحلت تبحث عن مين فيها يتشفع
**********************
من أكم من يوم ولِحمار والجمل يرجدن الزرع عَ البيادر ، وصارت بيادرنا مليانه غله والحارس عليها ساهر
بكره بنشد اللوح عَ الجحش والثور وبندرس ، قمحنا وعدسنا وشعيرنا .. وبتمتلي الدار شكاير
**********************
قالوا : يا شعب لا تخنع وخليك قوي جبار ، كيف الشعب ما بده يخنع وهو ذايق الذل والعار
يا ريت كاس الذل إبأيد العدو كان كسرناه ، بس الكاس إبأيد حامي الحمى .. ورب الدار
**********************
تقرأ بلهجة أهل سنجل
