مواويل -24
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
لما إجا المستعمر يستعمر ها لبلاد ،بسم النفط وشوية خوَن أوغاد
قبضوا حق الدم شوية مليارات ،وبدم العرب داسوا العرب والفضل للمزاد
**********************
ما في عنا إشي اسمه قوميه وحريه ،بقت شوية شعارات للخطب الشعريه
وصارت وحدة العرب من المحيط للخليج ،نكته سمجه يرويها حشاش بسخريه
**********************
في لبنان أشعلوها فتنة طوائف وأحقاد ،وفي العراق ركبوا تيار الشيعه والأكراد
والهدف يدمروا كل طاقات الأمه ،عشان نظل إحنا العبيد وهمه الأسياد
**********************
حيرّتيني كيف أطفي من عروقي النار ،بجوز لأنك مكمن الحب والأسرار
وبجوز لأنه مخي قاصر ومحدود ،وانت لا بحيطك حدّ ولا مدار
**********************
أمانة عمان الكبرى الله يزيدها عز وجاه ،ويعطيها سبحانه وتعالى اللي بدها إياه
ويثّقل عصاتها على كل بياع ما بده يسرق ،تيصيروا البياعين خارجين عَ القانون وعصاه
**********************
من زمان وأنا حاسس ها لقلب متغيرّ ، منحرق من الشوق ومش قادر يعبرّ
وها لنفس كأنها مملوده بالسكين ، والشوق كأنه عصفور يادوبه مطيرّ
**********************
مليان القلب حزن ومشعلل بالنار ، ما يدري من الشوق ولاّ من قسوة الجار
يا ما حذرت ها لقلب ما يتمادى بالشوق ، بس كل ما شديته يمين برتد لليسار
**********************
سرقنا العمر مثل الحلم وإحنا مش داريين ،يا ترى شو أخذنا من الحب على مدى السنين ؟
عشرين سنه بحبك بحرقه ونار ، وحتى لو مضى من عمري فوقها أخرى خمسين
**********************
كذب اللي قسمّ العمر مراحل للجمال ، اللي بشوفه في عيونك سحر ودلال
بقلبّني مثل الفروج عَ النار واللهب ،هوَستيني ،بتطلعي بجمالك للمحال
**********************
جايز أنه قدري اللي برميني فيك ،بتحرقيني بنار الهوى وبتنثريني في عينيك
جايز تبقى أحلامي أكبر مني بكثير ،بس إنت بعيده عني ما بتسمعيني لما أناديك
**********************
سمرا يا سيف ذو الفقار يغوص بقلبي ،كانه بدَوِّر في الحشا على مكامن حبي
بس حبك بكل خليه بنى قصر ودار ، يجازيك على عذابي وحرماني ربي
**********************
تقرأ بلهجة أهل سنجل
