مواويل -26
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
بكره جميعنا بنصير رعيان خنازير، والكرباج بعمل في ظهورنا حفافير
عشان شوية كراسي كرتون امخلّعه ، ذلونا وصار كل الشعب العربي طراطير
**********************
رضينا بالهم والهَم ما رضي فينا ، وحفرنا جورة السَوّ لحالنا بإيدينا
وسرقتنا الخوصه تحَزَّت الوريد وبق الدم،وصار نعل البسطار عَ شواربنا ومناخيرنا
**********************
حرقنا كل القِيَم والمباديء بالنار ، ومحينا من قاموس حياتنا العار
وبطل العيب يطاطي لحدا راس ، ولا يخزق عنيننا مخرز النعل ولا المسمار
**********************
مدّينا كل التاريخ وملدناه بالسكين ، ودسنا على انتصارات خالد وصلاح الدين
وصرنا ما نستجري انكِش الذبان ، ونتحامى من بعضنا ببساطير الشياطين
**********************
نفختنا قد نمرة البسطار اللي بظللنا ، وشرف وأخلاق ودين ما بقي عِنّا
وبقى الحيا مثل برادي الصالونات ، راح الحيا وقدّام خلق الله اتكشفنا
**********************
كل ما وقف واحد ورا مايكرفون ، قال أنا ابن ها لوطن اولِدِت وتربيت هون
ومن تراب ها لأرض نبت لحمي وقِسي عظمي ، ولمّا تِفلت إيده بقتل وبشرِّد مليون
**********************
لو الفعل في ها لوطن قد الشعارات ، كان ما حدا انجلط ولا حدا مات
وما في صمود وتصدّي عَ الورق ، ولمّا تِوقع الحرب بنصرف الها مهاترات
**********************
مليتوا الأرض يا أسيادنا الغزاويه بطولات ، وكتبتوا على وجه غزه أفخر الصفحات
وحبركم دم أحمر وأشرف من الشرف ، وغير الشهاده بشرف ما إلكم غايات
**********************
ملعون كل واحد بلبس وجهين ، وبزاود على أعراض الناس وعَ الدين
ولكرسي العار شروش بتشرب الدم ، وما بثبت غير على جثث الشعب لِمحطمين
**********************
عليتوا الرايه بسم الله الأكبر ،وعرب شارده كل قوم تابعه لمعسكر
فكرتوا الأصاله تدوس النذاله ، ويجبر الدم اللي من شرفنا اتكسر
**********************
رمينا الشبك في البحر تنصيد حوت ، ولاَّ شوية سمك تسد الرمق وقوت
لقينا البحر خاوي من الرزق خراب ، مليان عقارب وناسج جوّاه العنكبوت
**********************
تقرأ بلهجة أهل سنجل