مواويل – 40
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
ربنا خلق في البشر طبيعة حب الحياه وجمع الأموال ، وبقولك : طول عمر الحياه جهاد وتعب وشقا وهيذ الأحوال
آمنا بس شوفوا السبع إذا أكل وشبع ما عنده غريزة الافتراس ، بس الإنسان كل ما شبع زاد نهم وشراسه واقتتال
*******************
زمنك غالي وأملك عالي بس انت رخيص كثير ، حقك مال تنشرا وتنباع يوم في سوق الذهب ويوم بسوق الحمير
مش مهم وين اليوم سوقك ما دام بتنشرا وبتنباع ، مصيرك تعرف الغلط وتقول : يا ريت ما صار اللي بصير
*******************
قلبي مغلّق عَ الهم والكدر يا قلب ما أكبرك ، توسع أحزان الدنيا وبارود الدنيا يوم المعترك
يا قلب وسعت محبة الله اللي ما وسعها الكون ، مبارك من الله لمّا تمتلي إيمان بتصير ما أبركك
*******************
افتح الدمل واطلع اللي فيه ما بنقف عليك الوجع وبترتاح ، إذا همك يبقى جسمك مصان وقلبك معانق الأرواح
لا تخلي غير ايد الطبيب الجرّاح تعبث بدملك إذا بدك النقا ، واذا بدك تصير ميدان للتجارب أعتذر ومنك السماح
*******************
خبّي الدمعه جايز ييجي عليك زمن تتمنى تذرف دموع ، هذا الزمن يا ناس غريب وكل اشي فيه صار ممنوع
بكره بتروح بقروشك عَ الخباز تشتري رغيف سخن ، يرميهن بوجهك ويقولك خبزنا قبل ما ينخبز مبيوع
*******************
بقينا عيله في عِدل المحبه يجمعنا قلب كبير وفي أمين ، واندار العِدِل في أرض بور وطار بين الشوك الطحين
شو بده يرجع طحينا جوّه عِدِلنا مثل ما بقى زمان؟ ، ما ظنّي .. راح زمان وأيامه وشخصية الكبير انداست بالرجلين
*******************
من حق الذيب كل ما شاف الصيره مفتوحه يهجم ويخطف سخله ، ولاَّ عابوره يمزمز على لحمها ويعمل كل ما طرى عَ باله عمله
من حق الذيب يوكل غنمنا ويفني نِعَمنا ما دمنا راضيين ، الله يصلح كل تايه عن الدرب ويرده من غربته لأهله
*******************
الأرض المستهلكه قاعدين بزرعوا فيها من غير ما يصلحوها ، والأرض البكر من قلة لِفلاحه والزراعه قتلوها
ناس رغم كسادهم الفكري إلهم عمدان وصفحات ، وناس من غزارتهم مش لاقيين سطور عَ الورق يشحبروها
*******************
إن رافقت السبع جايز تصير سبع في يوم من ذات الأيام ، وان رافقت الواوي ولاَّ النمس بتمضيها ساطي عَ لِخمام
شتان ما بين عرين الأسد المصان وخم الجاجات ، شتان ما بين السبع والواوي يا غارق في عسل الأحلام
*******************
لمّا الرجل المنذور للعمل ومكلف إيجَمِّع امّقَطِع الأوصال ، يصير فارس من فرسان النميمه والدس والقيل والقال
سلام الله على بلد ها لولد من رجالها وكُفالها ، تغور البلد اذا ها لولد ينحسب عليها من كبارها وعلاليها و من راس المال
*******************
الغنم يا عقله انجربت والشجر قرّب يصير حطب للمواقد ، كله من عجزك يا عقله ومن قلة حيلتك وتخَلّيك عن الأوابد
إذا أنك يا عقله مش قد الحمل وزياده عَ الحِمِل شحطه ، خلي الغنم لراعي والشجر لمزارع وفارقنا وباعد
*******************
تقرأ بلهجة أهل سنجل