مواويل – 44
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
مسجون أنا جوّه النفس أبحث عن مخرج ، وشبّاك الدنيا مفتوح على سجني منّه أتفرّج
عَ اللي اشترى وعَ اللي باع وعَ اللي صدَق وخان ، وعَ السيرك الشّغال,عَ الحامي والناطط واللي بتدّحرَج
************************
نسّم عل فؤادي هوى هواها لِمشبّع بالندى ، فرّ من القفص وما عاد مُلك حدا
صار مُلك اجناحه بيته كل الفضا والسما ، طعم الحريه أنساه طعم ضيق القفص عَ طول المدى
***********************
نبت ربيع حبك حنّون أحمر يزين خدّك ، قطفت الحنون لِحمَر مثل خدك لِمّحَمَر مثل جفنك
تباهى حنّون خدك الورد وازدانت الضمّه ، هي ازدانت بخدّك ولاَّ بجفنك .. آه ما حدا قدك
************************
أنا الزارع وحبك المزروع جوّه القلب بتعالى ، حبك فَرِح ينبت من جوّه الجرح عَ القلب ساله
من يوم ما فَتّحْ ورد خدودك ازدانت ، غنّى القلب لحبك .. وسَمّع الديره صوته وموّاله
************************
لا تصرخ بصوتك العالي عَ الشمس يا موهوم ، الشمس ما بتخاف صوتك العالي حتى ولو ملغوم
الشمس اللي ظلت للحريه رمز من الأزل ، وللأبد بتظلها الشمس تحمل النا الأمل كل يوم
************************
يا غريب الحي طبعت بغربتك على عمرنا ، وامتد العمر من تحت الأرض مثل شرش شجرنا
يا غريب ان ما دق الوطن مثل الجرس فيك ، لا انتَ غريب ولا إلك وطن ولا قدرك من قدرنا
*******************
وجوه بنعرفها مألوفه النا مادّه في الأرض جذور ، ووجوه ما بنعرفها ولا مألوفه النا ولا بنقرا شو عليها محفور
بس لمّا تجمعنا الغربه ويلفنا حزنها بتصير المألوفه منها ، واللي مش مألوفه تجتمع تحت عنوان الغربه يا مقهور
************************
من ورا حيطان السجن من ورا شبّاك الحبس ، طلعت الحرّيه من الظلام الدامس مثل الشمس
ووقف الكون يحيي الحريه بأغاني الصبح، محموله عَ صوت عصفور صرخه وما عادت همس
************************
بتهون ان راد الله لا تحزن يا قلبي ولا تتعذّب ، لو أظلم ليلك وعضك كلب الأعادي لِمرَبرَب
الدنيا قد ما عبست لك بتفرد وجهها وبتتبسّم ، بس توَّكَل عَ الباري ولا تحسب حساب أجرب
************************
معضوض القلب اللي حبك بنياب كلب ، محروق القلب اللي حبك ومدعوس بكعب
نامت آهاتي لِمعَذّبه على خدك الندي ، من دمعة فرح نشفت بعد ما نزلت غصْب
************************
محروق اللي أسقى حبيبه السم وملعون بكل كتاب ، اللي قتل حبيب القلب وسلخ عنه الجلد والأهاب
محروق اللي هدم صرح بعد ما بنى أساسه بالحديد ، وضيّع مباهج العمر وعذّب عمر بشعر الوقار شاب
*******************
تقرأ بلهجة أهل سنجل