مواويل – 58
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
أحلى ما في المواسم انه بصيرلك اعتبار ، وبتصير مثل الهرم ولاَّ المنار تنزار
ويحملولك هدايا ووعود متلله إن صاروا ، وان ما صاروا ولاَّ ما صاروا طخها أبو لِحصيني وغار
*******************
بير المباديء يجمع المباديء مثل مية المطر ، واللي ما عنده بير يا طول ما يحيف فيه الخطر
يا طول ما يعطش وكل ما رمى الركوّه خاب الأمل ، راحوا أحبابه من حواليه وضرّه وما نفعه البطر
*******************
بيني وبينك يا عريس الحياه بدها تدفيس ، شر الناس الأهوج اللي ما بعرف يقيس
الدنيا يا سيدي مليانه خير وشر وأمانه ، الدنيا بدها أمين يعرف يسوق العيس
*******************
الحزن طبع في النفس مثله مثل الفرح ، بس الفرح عابر والحزن يا ما قطر ونزح
كل ما ينزح في القلب قطره يطهرها ، يطهِّر النفس لِمعَذّبَه وبالرحمه عليها مسح
*******************
قلب العاشق راشق ينبض حب وحنان ، قلب العاشق شارق با للوعه المُرَّه والأحزان
إن دَب الحب بنفس الدُّب يرفرف طيّار ، والقلب القاسي بتليَّن يصبح قلب إنسان
*******************
سرقنا من الليل تعليله ظلّت عَ البال إتّعِّن ، وكل ما سرحنا بسرحة خيال بنّحِنّ
للماضي اللي رسم عَ الحياه خطوّتنا وطرَّز ، عَ القبَّه ولِبنيكه تاريخ اجراسه بترِّن
*******************
لو طخ اللي طخه بعرس بجبهة قِتال ، كان سمع مطاقعة العدو وهو منهزم من غير قتال
يا خسارة المال المهدور والذخيره الرايحه طقع ، بس هذي شيَّم المهزومين ومش منا هذولاك الأنذال
*******************
ناس مخنثه نسوانهم رجال ورجالهم نسوان ، كل مَنوه منهم معترض عَ جنسه وزعلان
المَرَه بتوخذ هرمون يخَشِّن الصوت وينبت الشعر ، والزلمه حاطط عِدّة الغندره في الجزدان
*******************
الدنيا مسرح كبير والكل مشخِّص عَ الكل ، فيها نجم ستار وفيها كومبارس ذايق الذل
وفيهم شاري وفيهم بياع وفيهم سمسار، لمّا يوجه السوق ويعلا سعر الرجال بسوى مِلّ
*******************
ناس بتحمل هَمّ ، وناس بترمي هَمّ وهيذ الأحوال ، والهَمّ حِمِل عَ النفس يقِل الحِمِل ان توّزَع وانشال
للقلوب قِنِي إن فتح كل منّا عَ لبير قناه ، حُزنا الميه وما راحت هدِّر ولا صعب علينا حال
*******************
الله عَ الشمس محلاها دفاها قدّيش جذّاب ، إن طسَّك واستوطن فيك البرد ونرفز الأعصاب
تقوم تعَرِّض حالك للشمش وتعطيها مجال ، تقوم بدور الطبيب اللي بداوي وبسحب العذاب
*******************
تقرأ بلهجة أهل سنجل
