مواويل – 60
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
سنين الغربه مشَبَّعَه شوق وحنين ، فيها جراح بتنزف أمل وأنين
وفيها بسمات ينِزِّن مُر وعلقم ، سنين الغربه مقطوعه من العمر بسكين
*******************
فات الأوان حُط احزانك بكيس ، واربط كيس احزانك بخيط مصّيص
فات الأوان .. يا ريتك سمعت مني ، ومثل ما قلت لك قيس قبل ما تغيص
*******************
بعد ما بقى صوتي يلعلع عَ الأثير ، صرت حارس عَ باب فندق خفير
لازم أصرف لكل طالع وفايت بسمه ، واحني قامتي خضوع بظاهر احترام وتقدير
*******************
فتحنا الباب,سكرنا الباب,لن عوى كلب,نبحت الكلاب ، معروفه ما بدها تأويل ولا كتاب
واحد خاين وواحد مُستأجَر عَ الفضائيه بتهمّوا الأشراف إنهم أنذال واثنينهم كذّاب
*******************
كذاب من ادّعى وقال ما لا يعرف ، كذاب كل من خاض وصار بالكلام يهّرِف
كذّاب كل من تصدر مجلس غير مجلسه ، وكل ما كذب إيمان زور يحلف
*******************
اصحاب إحنا والليل والقمر,والقعده بين الدوالي والسهر ، وكل ما نسَّم نسيم الليل والندى صبيب مثل صب المطر
وتحدّي الحادي ويتفجّر صوته لِمّرَطب بنغمة حزن ، أحلام عشناها وشفناها تداعب قلوب البشر
*******************
لمّن سيدي إجا يعلمني أول معاني الفخر ، قال لي يا سيدي : إتق الله واحفظ صلاة الفجر
يا سيدي الكسل بورث الفقر والرزق طيّار ، وخبّي سِرَّك في صدرك الحسد قتّال بورث الفقر
*******************
فلسطين والعراق سيف الإمام اللي اسمه ذو الفِقار ، بطل اسمه الإنتفاضه أشعل تحت أقدام الغاصب نار
وبطل اسمه المقاومه خلاّ ليل الأمريكي أسود طويل ، كل ما امتد العمر بالاحتلال يا ما يذوق موت وعار
*******************
العمر كومة حطب وبسلامتك بتكسر كل يوم عود ، في عود صلب وعود ناخش وعود ماكله الدود
وعمرك شقي ونقي يحمل أحلام وأوهام وأشياء ، عمرك محَمّل عيدان صلبه وهَشّه .. آمال ووعود
*******************
ضاعت لِبلاد من بعدك يا بو العبد يا فارس الأرض المزيون، ضاعت لِبلاد وانباعت بسعر الفجل وقلعوا منها كروم الزيتون
ما ظلت روميه تشهد على أيام عظمتك لمّا بقى زمان وبقيت ، أبن الأرض اللي لو قالت آخ,قلت الها عمري إلك مرهون
*******************
الأمه لمّا تِستعِدْ بدها نخوة الله أكبر وحي على الجهاد ، ما بدها كلاب تسهر عَ الكاس والطاس والنهار تمضيها رقاد
الأمه لمّا تستعد بدها قياده نبيله تنبض بالشرف نبّض ، بدها فوارس وما بدها خوانع بدها مين يعيد الأمجاد
*******************
تقرأ بلهجة أهل سنجل
