مواويل – 61
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
كل من استلم مسؤول في دائره حكوميه بدّه ايحَمِّل ويشيل ، آذن ولاَّ مدير ولاَّ نائب ولاَّ وزير يصراحه وبلا تأويل
خلينا نكشف ها لحقائق ونعلنها بصراحه واللي بصير يصير ، أما ما دمت اترَقِّع من وراي وارَقِّع من وراك مني إلك رزيل
*******************
في كلاب بتحرس أسيادهم بتهجم وبتعمل بالعدو الأنياب ، وفي كلاب مثل أفضالنا بتكذب بالقلم ولِكتاب
وناس بتعمل جد وبتشوف اللازم والأشيا معدن ، وناس بتتجسس وبتكتب تقارير عن اللي ورا الأبواب
*******************
هذي الدنيا فيها وما فيها وما دامك حي ّوعايش بدك تداريها ، الملسِّن اللي بعرف ينافق ويمسح جوخ من كبارها وعلاليها
والمخلص من غير ما يعرف ينافق مشقوع عَ القفا جوز ، ومتهوم بقلبه ومنَجَّس سؤره ومتسَخِّم ومتشَحّبِّر فيها
*******************
شبِّع كلبك بحرس دارك جَوِّع بسَّك بوكل فارك ، حكمه صاغوها بالأمثال وقالوا خلّيها شعارك
صار الغني يوكلها بسط وينامها قسط بيده فرّارَه ، واللي مثلي ومثلك حتى باللقمه مشارك
*******************
طول عمر البايع خسران والشاري هو الربحان ، إن بقت الأرض ولاَّ الدار ولاَّ الشرف ولاَّ الإيمان
نيّال الشاري شاري الخير يهنئ بالشروه ويسعد ، والبايع بايع ... تايه في بلاد الله بلا عنوان
*******************
ها لصبره الثمره لمّا توصلها وتقطف حلاوتها ، لازم ايديك يتملّن شوك من شجرتها وقشرتها
بس لمّا تصبر عَ الصبره وتصير بيدك مقشَّرَه ، رح تنسى اللي مضى واللي جرى قدّام طعمتها
*******************
العضو اللي فسد لن رُحِت عَ الطبيب بقطعه ، مشفوع بنصيحه من القلب الفاسد للجسد ما بنفعه
ولن صار الضرر أكبر من النفع البتر هو الحل ، يا أهل الحل والربط صلوا عَ النبي واسمعوا
*******************
وعدتك بالوعد لسقيك يا كمّون مني وعد ، واستنى الكمون وعدي يا طول ما تستنى بعد
نشف الكمون وانقطف والوعد لسّه ما انتجز ، مجنون اللي يعيش على وعد ويبني عليه السعد
*******************
بابوج ورجلين عوج وشخاخ وبده ينام بالنص ، حرقتوا بنّها وشلوّطتوها وبتزعلوا لمّا أنُصّ ؟
لمّا يطلع الحكي نار من راسك شو بدك تقول؟غير تنتقد العَوَّج حتى لو الدنيا قالت هُص!!
*******************
طاب الجرح وذكرى الجرح تنقف في القلب تنهيد ، وكل ما قلت خليني أنسى ها لجرح الذكرى بتزيد
ملعون اللي قلع حلم من عين طفل انزرع من زمان ، قبل ما ييجي الطفل بأيد الأب وبأيد السيد
*******************
حلمي راح طقع مثل أحلام الناس ، قدّيش في الميمعه نزل راس وراس
والذليل مهما اتخبّا مليح جاييه الريح يشرب المنيه مثل غيره بالكاس
*******************
تقرأ بلهجة أهل سنجل